Memleket basshysy Qasym-Jomart Toqaev kezek kúttirmeıtin ózekti máselelerge basa nazar aýdarylǵan jáne olardyń sheshý joldary kórsetilgen, memlekettiń ishki jáne syrtqy saıasatynyń negizgi baǵyttaryn aıqyndaǵan jańa Joldaýyn jarııalady.
Joldaýda belgilengen sharalardyń mindetti túrde iske asýy kerek ekenin halyq ta jete túsinip, ony úlken úmitpen kútetini belgili. Sebebi osy mańyzdy qujat arqyly Prezıdent Parlamentke, Úkimetke, ortalyq atqarý organdary men sot jáne quqyq qorǵaý júıesiniń laýazymdy tulǵalaryna naqty tapsyrmalar júkteıdi.
Al bıylǵy Joldaýdyń orny tipten erekshe. Tórtkúl dúnıe pandemııanyń kesirinen buryn-sońdy bolmaǵan aýyr kezeńdi bastan ótkizýde. Keseldiń kúrdeli bolǵany sonsha, kóptegen memleket áli de onyń qursaýynan tolyq shyǵyp úlgergen joq. Bul indet bizdiń elimizge de aıtarlyqtaı zalalyn tıgizdi. Odan tek azamattardyń densaýlyǵy men ómirine qater tónip qana qoımaı, myńdaǵan shaǵyn, orta, iri kásipkerlikter, óndiris oryndary men aýyl sharýashylyǵy salalary, bilim berý isi men densaýlyq saqtaý júıesi buryn-sońdy bolmaǵan aýyrtpalyqty sezinip otyr. Tabysymyz tómendep, áleýmettik jáne qarjylyq máseleleri kúrdelenip ketti.
Mine, osyndaı jaǵdaıdan árkim óz betinshe jol taýyp shyǵýdyń amalyn qarastyryp júrgen sátte Memleket basshysynyń Joldaýy ár qazaqstandyqtyń bolashaqqa degen senimin kúsheıtip, qaıratyna qaırat qosyp otyr. Sondyqtan bul Joldaý der kezinde jaryq kórgen óte qundy tarıhı qujat boldy deýimiz kerek.
Árıne, tótenshe jaǵdaı men karantın jarııalanǵan sátten bastap Úkimet tarapynan halyqqa kómek kórsetý jumystary belsendi júrgizilýde. Bılik pen halyqtyń ózara túsiniginiń arqasynda bizdiń memleket bul keseldiń betin qaıtaryp, tıimdi is-sharalardy bekitip úlgerdi. Qalaı bolǵanda da «saqtyqta qorlyq joq» demekshi, bárine daıyn bolǵanymyz abzal. Bul rette, Joldaýdyń máni de erekshelene tústi. Ásirese ósip-óný jolynda Elbasynyń «Bes ınstıtýttyq reformany júzege asyrý jónindegi Ult josparyn» negizgi baǵyt-baǵdar etip, el-jurttyń dáýletti ómir súrýine múmkindik jasap, olardyń konstıtýsııalyq quqyqtaryn qorǵaýǵa, zań ústemdigin qamtamasyz etýge, sybaılas jemqorlyqqa qarsy birigip kúres júrgizýge jumys qarqyndaıtyny aıtyldy.
El múddesin kózdeı otyryp qabyldanatyn mańyzdy is-sharalar men qujattardy aıqyndaıtyn jáne qajetti reformalarmen aınalysatyn Strategııalyq josparlaý jáne reformalar agenttiginiń qurylýyna mol senimmen qaraýǵa bolady. Endigi rette, memlekettik jáne kvazımemlekettik uıymdardyń qyzmetkerlerin qysqartatyn, kásibı deńgeıi joǵary, adamgershiligi mol, adal jáne jemqorlyqqa qarsy tura alatyn mamandardy qaldyryp, olardyń eńbek aqysyn eselep ósirý máselesin sheshetin ýaqyt jetti.
Joldaýda aýyl sharýashylyǵyn damytyp, otandyq ónimderdiń básekege qabilettiligin arttyrýǵa baǵyttalǵan tapsyrmalar óte oryndy. Jer emgen, mal asyrap, jemis-jıdek ósirgen kásip ıelerine uzaq merzimge tómen paıyzdy nesıe berilýine, olardyń jıǵan ónimderiniń laıyqty baǵamen satylýyna jaǵdaı jasalsa deımiz.
Sonymen qatar Joldaýda ekologııa máselesine erekshe nazar aýdaryldy. Ásirese tabıǵatty qorǵaý jumystaryna jas jetkinshekterdi tartý jónindegi tapsyrmany búgingi kúnniń ózekti máselesi dep aıtýǵa bolady.
Joldaýda aıtylǵandaı, azamattardyń quqyǵyn qorǵaý organdary men sot júıesine talapty kúsheıtý tapsyrmasy iske asyrylyp, otandastarymyz bos áýrege salynbasa, ádildikke qol jetkizetin bolsa, memleket pen zańǵa degen senim artatyny sózsiz.
Ramazan SÁRPEKOV,
professor, Qazaqstan Respýblıkasy Zańnama jáne quqyqtyq aqparat ınstıtýtynyń dırektory