Qostanaı oblysyna qarasty Meńdiqara aýdanynda jergilikti kásipkerler kópbalaly Arzamasovtar otbasyna úı alyp berý úshin qarjy jınap jatyr. «Biz birgemiz!» aksııasy aıasynda qolǵa alynǵan qaıyrymdylyq sharaǵa elıtaly bıdaı tuqymyn ósiretin «Qarqyn» agrofırmasy da atsalysty. Seriktestik basshysy Erkin Buqanov kópbalaly otbasyna 1 mln teńge tabys etti.
Aýdandaǵy Harkov eldi mekeniniń áleýmettik máselesi de túgeldeı osy seriktestiktiń moınynda. Mundaǵy qazaq-orys synyby aralas Sosna orta mektebinde 180-ge jýyq shákirt bilim alady. Taıaýda ǵana seriktestik bul mektepke quny 1,5 mln teńge turatyn IT-kabınet jasaqtap berdi. Bul synypta 11 kompıýter, 1 noýtbýk jáne prınter bar. Kabınet tolyqtaı veb-kameramen, ınternetpen qamtylǵan. Seriktestik mektepti jyl saıyn jóndeýden ótkizip otyrady.
– Sport zalymyzdyń shatyryn jóndep, búkil esikterdi jańartyp berdi. Bıyl búkil terezelerdi aýystyryp bereıin dep otyr. Qysqy maýsymda mektep ǵımaratyn jylytatyn otyn túsirip beredi. Kóktemde stadıonǵa tabıǵı gazon tuqymyn seýip qoıdy. Bul kelesi jyly aýyldyń jas sportshylary tabıǵı jasyl shóp tóselgen zamanaýı stadıonda jattyǵady degen sóz. Mektebimizde «Rýhanı jańǵyrý» baǵdarlamasy aıasynda ulttyq dástúrli mýzykany nasıhattaıtyn Jetigen synyby ashyldy. Bul da «Qarqyn» seriktestiginiń qarjysy arqyly júzege asyp otyrǵan ıgi joba, – deıdi mektep dırektory Jandos Keńesbaev.
Aýyldyń balabaqshasy men Mádenıet úıi de seriktestiktiń menshiginde. Toqsanynshy jyldary aýksıonǵa túsken bul ǵımarattardy bazbir pysyqaılar buzyp, qalaǵa qurylys materıaly retinde tasyp ala ma dep qaýiptengen «Qarqynnyń» sol kezdegi basshysy Saıran Buqanov óz menshigine satyp alyp, aman alyp qalǵan. Keıin kúrdeli jóndeýden ótken eki ǵımarat ta búginde aýyl turǵyndarynyń ıgiligine qyzmet etýde. Aýyl balabaqshasynda eki top bar. Birinshisi balalarǵa qazaq tilinde, ekinshisi orys tilinde tárbıe beredi. Sábılerdiń barlyǵy tegin tamaqtanady. Balabaqshaǵa kerekti tósek-oryn, tósenish, ydys aıaq, oqý-tárbıe, oıyn quraldarynyń bári seriktestik qarjysyna satylyp alynǵan.
– Ákem maǵan: «Eń aldymen halyqtyń jaǵdaıyn oıla. Qaramaǵyńda jumys istep júrgen qarapaıym jumyskerdi qurmette. Sonyń jaǵdaıyn jasa. Mańdaı terimen tapqan eńbekaqysyn laıyqty tóle!» dep únemi aıtyp otyrady. О́zi de solaı jasady. Bul – bizdiń agrofırmanyń aınymas zańy. Osy 22 jyldyń ishinde ákem turmysy tómen otbasylardan tańdap alyp, 3 balany Qaraǵandy medısınalyq ýnıversıtetine dáriger mamandyǵyna oqytty. Jeti jyl boıy árqaısysynyń oqý aqysyn tólep otyrdy. Qazir sol balalardyń bireýi bizde, bireýi Qaraǵandyda, bireýi Tobyl qalasynda jumys istep jatyr. Bári de qazaq balalary ǵoı. Olardan bizge eshteńeniń keregi joq. Tek shart qoıamyz. Birinshi, Qazaqstanda jumys isteýi kerek. Shetelge ketip qalmaýy tıis. Ekinshiden, dertine shıpa izdep aldyna kelgen aýyl adamynyń betin qaıtarmaı, jyly qarsy alyp, shyn nıetimen emdeýi kerek. Basqa eshteńe talap etpeımiz, – deıdi Erkin Saıranuly.
Bul aýyldyń yrys-berekesin arttyryp, yryzdyǵyn eselep otyrǵan qamba toly dán de, tóskeı toly mal da kókten túsken joq. Barlyǵy tabandy eńbektiń, erte kóktemnen sary kúzge deıin tógilgen mańdaı terdiń arqasynda kelgen ıgilik.
Qostanaı oblysy