Jas Otan jastar qanaty búginge deıin birtalaı istiń basy-qasynda júrip, el úmitin aqtap keledi. Volonterlik jumystary týraly Jas Otan jastar qanaty Nur-Sultan qalalyq fılıalynyń tóraǵasy Baqdáýlet Jandildaev tolyǵyraq tarqatyp bermek.
− 2020 jyl «Volonter jyly» dep atalǵan sátten bastap jasotandyqtardyń kúshi bekemdenip, ortaq maqsat jolynda eńbek etýge kiristi. Buǵan deıin de aıtýly is-sharalar men qoǵamdyq jumystarda belsendilik tanytsaq, bul joly arnamyzdy keńeıtýge atsalysa bastadyq. Pandemııanyń aýyr zardaptaryna qaramastan, halqymyzdyń yntymaǵy men aýyzbirshiligi odan ári nyǵaıa tústi. Osy tusta volonterlerdiń eren eńbegi kópshilik aldynda elengenniń ústine elene berdi. Qalyń eldiń alǵysynan keıin, qalaısha tynysh otyra alamyz?! – deıdi Baqdáýlet Jandildaev.
Elordalyq jasotandyqtardyń jetekshisi eń belsendi jastarmen birge «Baqytty otbasy», «Ardagerlerdi ardaqtaıyq» jáne taǵy basqa partııalyq jobalar aıasynda az qamtylǵan jáne kópbalaly otbasylarǵa, sondaı-aq jalǵyzbasty qarttarǵa qolushyn sozdy.
− Elde indettiń beleń alǵan kezinde «Biz birgemiz» jalpyulttyq aksııasynyń sheńberinde qalalyq jastar saıasaty basqarmasyna qarasty volonterler shtabymen birge 10 myńnan asa azyq-túlik sebeti men gıgıenalyq zattar, sonyń ishinde 500 myń medısınalyq betperde taratyldy. Sonymen birge Nur Otan partııasynyń qoldaýymen aksııanyń ekinshi tolqynynda qalaǵa 2 mln medısınalyq betperde ákelinip, sonyń úshten birin tabystadyq, − deıdi belsendi.
Beıdaýa keseldiń aptyǵyn basýǵa dárigerlermen birge volonterler de septesip keledi. Osy oraıda jasotandyqtar elordadaǵy 2,5 myńdaı medısına qyzmetkerine «Alǵys paketterin» tapsyrǵan edi. Árbir sebette dárigerlerge arnalǵan vıtamınder men paıdaly ónimderdiń onnan asa túri jınaqtaldy. Budan ózge, adam aǵzasyna daýa bolatyn qymyz ónimi de jetkizildi. Aksııa elimizdiń barlyq óńirinde jalǵasyn taýyp, aıryqsha qoldaýǵa ıe boldy.
Baqdáýlet Jandildaevtyń aıtýynsha, qasıetti Qurban aıt merekesinde «Nur-Astana» meshitiniń, qalalyq Din isteri basqarmasynyń jáne qalalyq jastar saıasaty basqarmasyna qarasty eriktiler shtabynyń múshelerimen birlese otyryp, 31 shilde men 2 tamyz aralyǵynda medısına qyzmetkerlerine ystyq tamaq jetkizip bergen. Sondaı-aq tegin tamaqpen kún saıyn 2 700-den asa qyzmetker jumys isteıtin 12 stasıonar qamtylǵanyn aıtyp ótti.
«Taǵy bir aıta keterligi, elordada bıyl shomylý maýsymynda adam ólimi azaıdy. О́ıtkeni bizdiń volonterler Tótenshe jaǵdaı departamentiniń qyzmetkerlerine qolǵabys etip, birtalaı zardaptyń aldyn aldy. Keshendi sharalardyń arqasynda eresekter ólimi 28 paıyzǵa, al balalar ólimi 100 paıyzǵa tómendedi. Igi dástúrdi jasotandyqtar jyl saıyn jalǵastyryp keledi», deıdi qalalyq Jas Otan jastar qanatynyń tóraǵasy.