Memleket basshysy qyrkúıektegi Joldaýynda buqaralyq sportqa, dene tárbıesine jáne balalar sportyna basymdyq berip, ár oblysta, iri aýdan ortalyqtarynda sport úıirmelerin ashýdy tapsyrǵan bolatyn. Osyǵan oraı Prezıdent janyndaǵy ortalyq kommýnıkasııalar qyzmetinde «Qazaqstandaǵy buqaralyq sportty tıimdi damytý» taqyrybynda brıfıng ótti.
Is-sharada birinshi bolyp sóz alǵan Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵynyń dırektory Abzal Tuńǵataruly elimizdegi sport nusqaýshylarynyń bárin biliktilik kýrsynan ótkizý josparlanyp otyrǵanyn jetkizdi.
«Biz qazaqstandyq aýyldardy sport nusqaýshylarmen qamtamasyz etýdi josparlap otyrmyz. Osy maqsatta qazir ortalyǵymyzda sport nusqaýshylaryna arnalǵan ádistemelik nusqaýlyq ázirlenip jatyr. Onyń jobasy daıyn, bul árbir sport nusqaýshysy úshin keńes kitapshasy bolady. Kelesi jyldan bastap oqý-ortalyǵymyzdyń mamandarynan jasaqtalǵan arnaıy top barlyq óńirdi aralap, sport nusqaýshylaryn oqytady. Elimizdegi árbir sport nusqaýshysyn teorııalyq jáne praktıkalyq turǵyda biliktilik kýrsynan ótkizýdi kózdep otyrmyz», dedi A.Tuńǵataruly.
Onyń aıtýynsha, Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵy qoǵamda, áleýmettik jelilerde, buqaralyq aqparat quraldarynda jáne adam kóp shoǵyrlanatyn oryndarda buqaralyq sportty nasıhattaýmen aınalysady. Bul úshin ortalyq túrli tanymdyq vıdeo rolıkter men bılbordtar, sondaı-aq qyzyqty jobalar ázirleıdi. Sonyń biri – «Belsendi el» jobasy. Buqaralyq sportty halyq arasynda dáripteıtin jáne sportpen shuǵyldanýǵa shaqyratyn «Belsendi el» jobasy aıasynda arnaıy saıt iske qosylǵan. Oqyrmandar onda jarııalanǵan materıaldar men maqalalardan qandaı sport túrleriniń naqty qaı jaǵynan tıimdi, qaısy aýrýdyń aldyn alýǵa baǵyttalǵanyn bile alady. Sodan soń saıtta kórsetilgen sport klýbtarynyń kartasymen ózine qajetti oryndy taba alady.
Brıfıng barysynda Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵy ázirlegen tanymdyq vıdeorolık kórsetildi. Ondaǵy aqparatqa súıensek, Qazaqstanda juqpaly emes aýrýǵa ushyraǵan naýqastardyń 84 paıyzy qaıtys bolady. Elimizde jyl saıyn 30 myń adam júrek-qan tamyrlary aýrýlarymen, 15 600 adam tynys alý aýrýlarymen, 37 800 adam qant dıabetimen aýyrady. Únemi dene shynyqtyrýmen shuǵyldaný adamdy joǵaryda atalǵan aýrý túrlerimen syrqattanýdan saqtaıdy.
«Mektep sport federasııasy» zańdy tulǵalardyń qaýymdastyq nysanyndaǵy birlestiginiń resmı ókili Álııa Maıdanqyzy balalar sportynyń mekteptegi dene shynyqtyrý pánimen ǵana shektelip qalǵanyna toqtaldy.
«Qazirgi tańda buqaralyq sportqa kóp kóńil bólinip jatyr. Oǵan qýanamyz. Biraq balalar sporty mekteptegi dene shynyqtyrý pánimen ǵana shektelip qaldy. Aıtalyq, aýladaǵy sport alańdary jóninen damyǵan elderden kóp artta qaldyq. Bul nege ákeldi? Sportpen shuǵyldanatyn balalardyń sany elimizde 30 paıyzdan aspaıdy. Ásker qataryna shaqyrylatyn jastardyń 40 paıyzy dimkás, talaptarǵa sáıkes kelmeıdi. Múgedek balalar kóbeıdi, oqýshylar arasynda kózi nashar kóretinderdiń qatary kún saıyn artyp keledi. Qazaqstanda 1970 mektepte dene shynyqtyrý zaly joq. Mekteptegi sportty damytý jumysyn aldymen osy máseleni sheshýden bastaý kerek», dedi Á.Maıdanqyzy.
Al «Uly dala skaýttary» qoǵamdyq birlestiginiń bas hatshysy Ildar Katenov balalardy sportpen turaqty shuǵyldanýǵa baýlýdyń óte ońaı ekenin aıtady.
«Balany úıretýdiń eń tıimdi joly bar. Bul – aıtýmen emes, ispen kórsetý. Atalǵan máselede aldymen ata-ana balaǵa úlgi bolýy kerek, eresekter sportpen aınalysýy qajet. Balalar úlkenderge elikteıdi. Sondyqtan dál osy máselede aldyńǵy tolqyn balalardyń buqaralyq sportpen aınalysýy úshin ne qajet ekenine mán berýi tıis», dedi I.Katenov.