Memleket elimizdegi azamattyq qoǵam damýyna erekshe kóńil bólip keledi. Sonyń jarqyn bir kórinisi jaqyn arada elimizde kezekti Azamattyq forýmnyń ótkizilýi. Osyǵan oraı keshe «Qazaqstannyń azamattyq Alıansy» ZTB prezıdenti Nurlan Erimbetov arnaıy baspasóz máslıhatyn ótkizdi.
Memleket elimizdegi azamattyq qoǵam damýyna erekshe kóńil bólip keledi. Sonyń jarqyn bir kórinisi jaqyn arada elimizde kezekti Azamattyq forýmnyń ótkizilýi. Osyǵan oraı keshe «Qazaqstannyń azamattyq Alıansy» ZTB prezıdenti Nurlan Erimbetov arnaıy baspasóz máslıhatyn ótkizdi.
Qazaqstan Respýblıkasy Ortalyq kommýnıkasııalar qyzmetiniń resmı ókili Altaı Ábıbýllaev azamattyq qoǵam ókilderi qoǵamdyq baqylaý ınstıtýttaryn nyǵaıtýda zor ról atqaryp kele jatqandyǵyn erekshe atap ketti. Onyń málimetine qaraǵanda, qazirgi kezde elimizdiń ár óńirinde basty forým ótkizý aıasynda túrli is-sharalar uıymdastyrylýda. Bul rette ústimizdegi jyldyń 14-15 qarashasynda elordadaǵy Táýelsizdik saraıynda azamattyq forým ótetinin aıta ketý kerek. Qazirgi tańda azamattyq forýmnyń negizgi maqsaty memlekettik organdar men úkimettik emes uıymdar arasyndaǵy qarym-qatynastardy keńeıtý bolsa, olardyń arasynda ashyq ta barshaǵa túsinikti yntymaqtastyqty ornatý basty másele.
Myńǵa jýyq úkimettik emes uıymdardy biriktiretin «Qazaqstannyń azamattyq Alıansy» zańdy tulǵalar birlestiginiń prezıdenti ústimizdegi jyldyń 11 qazanyndaǵy Úkimettiń keńeıtilgen otyrysynda Memleket basshysynyń bergen synı tapsyrmalaryn iske asyrýǵa degen azamattyq alıanstyń úlesin jáne úkimettik uıymdardyń tynys-tirshiligin áńgimelep berdi.
Sońǵy jyldary úkimettik emes uıymdar qyzmeti kóz aldymyzda quldyraı bastaǵan. Nurlan Erimbetovtiń aıtýynsha, kezinde tirkeýden ótken 27 myń úkimettik emes uıymdardyń qazirgi tańda 1,5-2 myńy qalsa jaqsy. Buryndary ÚEU jeńil bıznes kózine aınalsa, zańdyq ózgeristerge sáıkes búginde oǵan jol joq. Sondyqtan olardan kópshiligi ketip qalǵan. Zań talabyna sáıkes bul salada istegisi keletinder aldyn ala tólem jasaýy tıis eken. Alaıda, múgedektermen, nashaqorlarmen jáne ózge de qoǵamnyń álsiz toptarymen jumys isteıtinder ondaı aldyn ala tólemdi jasaı almasa kerek. Sondyqtan da bul salada tek óz isine berilgender ǵana qalyp otyr.
Osy rette N.Erimbetov úshinshi sektordy qoldaý qajettigi bılik tarapynan túsinistik týdyryp otyrǵandyǵyn tilge tıek ete kelip, olardy qajetti saıası sátte paıdalanyp qalý degen uǵymnyń bolmaýy kerektigine nazar aýdardy. Qazirgi turaqsyzdyq jaılaǵan álemdegi oryn alyp jatqan keleńsizdikter azamattyq qoǵamnyń uıyspaǵandyǵynan, deıdi ol. Álemde azyq-túlik, sý men munaı qorlary azaıǵan saıyn ózge eldiń aýmaǵyna kóz alartýshylar kóbeıedi. Sol kezde eldiń qaýipsizdigi azamattarynyń sany men qarý-jaraǵynyń kóptigine emes, qoǵamynyń uıysýyna baılanysty bolmaq. Sondyqtan, úkimettik emes uıymdar Úkimettiń qoly jete bermeıtin salalarda áreket etýdi jón kórip otyrǵandyqtarymen bólisti.
Nurlan Kenjebekuly qarjy tabylsa, kóp sharalar uıymdastyrýǵa bolady dep esepteıdi. Ásirese, óńirlerde memlekettik emes uıymdar jumysy ákimderdiń kóńil-kúıine qaraı uıymdastyrylatynyn da jasyrmady. Onyń málimetine qaraǵanda, keı ákimder úshinshi sektorǵa qolushyn berse, keıbiri tipti, olardy qajet etpeıtin de kórinedi. Nege qoǵam ómiri bir basshyǵa baılanysty bolýy kerek? Sondyqtan úkimettik emes uıymdar jumysy ákimniń reıtıngisin anyqtaýda da eskerilýi qajet.
Asqar TURAPBAIULY,
«Egemen Qazaqstan».