Ol ınternet-resýrstyń ártúrli tanymal saıttaryna jumys berýshi bolyp habarlandyrý ornalastyrǵan. Tuzaǵyna túsetinder habarlassa, barlyq derekter men karta nómiri kórsetilýge tıisti kelisimsharttyń jobasyn laqtyrǵan, dep habarlaıdy Egemen.kz
Ańǵal adamdar ony toltyryp, alaıaqtyń ózine jibergen. Al anaý sondaǵy derekterdi paıdalanyp, shaǵyn nesıelik uıymdardan nesıe alyp, olardy aldanýshynyń kartochkasyna aýdarǵan. Biraq aldyn ala oǵan habarlasyp, "buryn jumystan shyǵarylǵan qyzmetkerdiń esepshoty bolmaǵandyqtan onyń aqshasyn sizdiń atyńyzǵa aýdaramyz. Al siz ony kıvı-ámııanǵa aýdara salyńyz» dep bııazy daýyspen ótingen. Bolashaq "jumys berýshini" kim aldaǵy keledi, esepshotyna túsken aqshany bári birdeı onyń aıtqan jerine aýdarǵan. Sóıtip, óz atyna resimdelgen nesıeden óstip aırylyp qalǵan. Aýdarylǵan qarajat mólsheri 160-tan 220 myńǵa deıingi somany quraǵan.
Qazir buryn sottalǵan 30 jasar alaıaq ustalyp, onyń ústinen Qylmystyq kodekstiń 190-baby boıynsha is qozǵaldy. Tergeý barysynda aldaýǵa túskenderdiń naqty sanynyń qansha bolǵany anyqtalady.
"Onlaın-nesıege qatysty osyndaı faktiler buryn da tirkelgen. Biz túsindirý jumystaryn júrgizdik, biraq adamdar ózderiniń derbes málimetterin usyna otyryp, alaıaqtardyń qarmaǵyna túse beredi. Olar tólemder boıynsha bereshektiń bolýy týraly habarlama ala bastaǵan kezde ǵana nesıeniń resimdelgeni týraly biledi. Osyndaı alaıaqtyq áreketterdiń qurbany bolmas úshin telefon, ınternet-resýrstar arqyly kez-kelgen málimetterdi usynbaǵan abzal", deıdi Petropavl qalasynyń PB bastyǵy, polısııa polkovnıgi Jandos Muhatov.