Qostanaıda turmystyq qylmystyń aldyn alýdy kózdeıtin "Otbasyndaǵy zorlyq-zombylyqqa jol joq!" dep atalatyn aksııa ótti, dep habarlaıdy Egemen.kz
Sharaǵa qatysýshylardyń aıtýynsha, oblysta jyl basynan beri eki myńnan astam áıel óz shańyraǵynda kórsetilgen qorlyqtan zardap shekken. Aksııa aıasynda jergilikti polısııanyń aǵa ınspektory Juldyz Qabenova otbasynda turmystyq zorlyq kórgenderdi qabyldaý ortalyǵyna kelýshilermen kezdesti. Júzdesý barysynda úıde otyryp qalyp, turmystan qaǵajý bolǵan azamatshalardy jumysqa ornalastyrý, qaıta oqytý, olarǵa tıisinshe áleýmettik kómek kórsetý joldary qarastyrylyp, otbasyndaǵy álimjettiktiń aldyn alý máseleleri sóz boldy.
Aksııanyń maqsaty – áıelderge qatysty zorlyq-zombylyqtyń aldyn alýǵa, ana men balany qorǵaýǵa, otbasynyń qoǵamdaǵy rólin nyǵaıtýǵa baǵyttalǵan jobalardy kópshilikke tanystyrý.
"Oblysta byltyrdan beri júrgizilip kele jatqan bul baǵyttaǵy maqsatty sharalardyń nátıjesinde turmystyq quqyq buzýshylyqtyń 29%-ǵa azaıǵany baıqalyp otyr", dedi Juldyz Qabenova.
Búginde oblys ortalyǵynda otbasylyq zorlyq-zombylyqqa qatysty máseleler boıynsha áıelder men balalarǵa arnalǵan daǵdarys ortalyǵy jumys isteıdi. Mundaǵy mamandardyń aıtýynsha, aımaqta bıylǵy 8 aı ishinde áıelderge qatysty 2 myń 584 quqyq buzýshylyq tirkelgen. Sondaı-aq 2611 adam otbasy-turmystyq qatynastar salasyndaǵy quqyqqa qaıshy áreketteri úshin ákimshilik jaýapkershilikke tartylǵan.