"Aqtaý-Úrgenish-Aqtaý" baǵytyndaǵy áýe reısi aptasyna 2 ret ıaǵnı demalys kúnderi qatynaıdy dep josparlanǵan. Bul týraly Mańǵystaý oblysynyń ınvestısııalar jáne týrızmdi damytý basqarmasy málim etti, dep habarlaıdy Egemen.kz.
Búgin Mańǵystaý oblysy men Horezm oblysy ákimdikteriniń ókilderi men eki eldiń áýe kompanııalary ókilderiniń qatysýymen beınekonferensııa ótti. Onda Aqtaý men Úrgenish arasynda áýe reısin ashý jaıy talqylandy. Qalalar arasyndaǵy barys-kelisti jandandyrý "Uly Jibek joly" jobasy aıasynda júzege asady.
Mańǵystaý oblysynyń ınvestısııalar jáne týrızmdi damytý basqarmasynyń basshysy Nurbek Aıtjanov qos el arasynda áýe reısterin ashý úshin Mańǵystaý oblysy daıyn ekenin jetkizdi.
"Qazaqstan-О́zbekstan yntymaqtastyǵyn barlyq salada jandandyrýǵa jáne odan ári damytýǵa Mańǵystaý óńiriniń basshylyǵy atynan turaqty reısterdiń ashylýyna qoldaý bildiretinimizdi jetkizemin. Eki qala arasyndaǵy áýe qatynasy qashan ashylatyny О́zbekstan tarapy tolyqtaı daıyn bolǵanda belgili bolady", dedi ol.
Aqtaýdaǵy О́zbekstannyń Bas Konsýly Nodırjan Týrgýnov eki el arasyndaǵy týrızm salasynyń damýyna oń áser etenine senim bildirdi."Búgingi kezdesý óńiraralyq yntymaqtastyqty jańa deńgeıge kóterýdiń jemisti alańy bolatynyna, Úrgenish pen Aqtaý arasynda turaqty reısterdiń ashylýy О́zbekstan men Qazaqstan arasynda týrızm salasynyń damýyna yqpal etetinine senim bildiremin", dedi bas konsýl.
Beınekonferensııa barysynda Aqtaý halyqaralyq áýejaıynyń dırektory Selchýk Kıledjı men onyń orynbasary Merýert Joldybaeva qos eldiń týrıstik áleýetin arttyrý baǵytynda jańa joba usyndy.
"Álemniń túkpir-túkpirinen kelgen jolaýshylar, túrki tarıhyna qyzyǵýshylyq tanytqandar Ystambul arqyly Aqtaýǵa, Aqtaýdan Úrgenishke ushyp kete alady. Hıýanyń sulýlyǵyn kórip, ári qaraı Buhara, Samarqand, Tashkent, Túrkistan jáne Úrimshi qalalaryna barýǵa múmkindik alady. Bul týrıstik baǵyt úlken suranysqa ıe bolady degen senimdemiz. Osylaısha, Aqtaý qalasy týrızmniń habyna aınalady", dedi Merýert Joldybaeva.
Sondaı-aq, Qazaqstan men О́zbekstannyń tarıhı qalalaryn qamtıtyn birlesken týrıstik marshrýttar men baǵdarlamalardy ázirleý týraly usynys aıtyldy.