Búgin elordanyń barlyq aýdandarynda "World Cleanup Day" ("Dúnıejúzilik tazalyq kúni") ekologııalyq aksııasy: aǵashtar otyrǵyzý jáne "Birge – taza Qazaqstan" senbiligi ótti. Tek búginniń ózinde eki myńnan astam aǵash otyrǵyzyldy, dep habarlaıdy Egemen.kz.
“Elordamyzda ekologııalyq aýmaqtardyń qatary artyp keledi. Qalanyń tynys alý múshesindeı bul terrıtorııalardy abattandyramyz: aǵash, buta, japyraqty jáne qylqan japyraqty kóshetter otyrǵyzamyz. О́simdikterdi saqtaý maqsatynda taldardy keskeni úshin otyrǵyzylatyn kóshetterdi eki esege kóbeıttik. Eger buryn “birge bes” bolsa, qazir “birge on”.
Trıatlon men Prezıdent saıabaǵyn jalǵap turǵan kópirasty keńistik (Saraıshyq) qazir adam kóp jınalatyn, sportpen aınalysyp, jastardyń bas qosatyn ornyna aınaldy. Buǵan deıin bilesizder, bul jer bos jatqan edi. Jóndeý jumystarymen qosa, kommýnaldyq qyzmetkerlerimiz de terrıtorııany abattandyrýmen aınalysty. Búgin áriptesterimizben, volonterlermen, ekobelsendilermen, sportshylarmen, ártistermen jáne qorshaǵan ortaǵa beı-jaı qaramaıtyn barlyq azamattarmen birge aǵash kóshetteriniń kezekti partııasyn otyrǵyzdyq. Osy sharaǵa qatysqan barlyq azamatqa rızashylyǵymdy bildiremin!
Bul terrıtorııany áli de gúldendiremiz. Qazirdiń ózinde onda basketbol alańy men balalar alańy, work-out, bıshilerge arnalǵan sahna, ıogamen aınalysýǵa arnalǵan oryn jáne t.b. bar. Pırs ornatylyp, úlken fýtbol alańy salyndy. Bıyl osyndaı 50 qoǵamdyq keńistik, 150 jańa aýla abattandyryldy. Kógaldandyrý isi boıynsha barlyq jerge kóńil bólemiz.
Bıyl otyrǵyzylǵan taldar sany 30 myń, barlyq egilgen jasyl-jelek 80 myńǵa jetedi. Bul sıfrdy jyl saıyn kóbeıtip otyramyz,” - dep jazdy Altaı Kólginov áleýmettik jelidegi paraqshasynda.