Aqparat jáne qoǵamdyq damý mınıstri "Balaevaǵa 3 suraq" baǵdarlamasynda el arasynda dúrbeleń týǵyzyp júrgen blogerlerlerdiń máselesi retteletinin aıtty, dep habarlaıdy Egemen.kz.
"Saýaty bar adam árqashan resmı aqparatqa senedi. Blogerler súzgiden ótpegen aqparattardy óziniń oqyrmandaryn kóbeıtip, olardy qyzyqtyrý úshin ǵana jyldam jarııalap jatady. Al kásibı jýrnalıst eń aldymen aqparattyń shynaıylyǵy men onyń zańǵa sáıkestigin tekserip, redaktorlar súzgisinen ótken materıaldy ǵana jarııalaıdy. Keı kezde blogerlerdiń jaýapsyzdyǵynan jalǵan aqparattar tarap, ol taqyryptar halyq arasynda qyzý talqyǵa túsip jatady. Sol aqparattyń barlyǵyn resmı aqparatpen qarastyryp otyrý kerek", dedi A.Balaeva.
Onyń aıtýynsha, jalǵan aqparat taratýshy blogerler máselesi aldaǵy ýaqytta zańmen retteledi.
"Blogerler aqparattyq quralǵa jatpaıdy. Sondyqtan zań júzinde olardyń isterine biz eshqandaı shekteýler jasaı almaımyz. Eger zań ózgerip, jańa talaptar bolyp jatsa, onyń barlyǵy retteletin dúnıe. Oǵan ýaqyt kerek. Bul bizdiń mınıstrliktiń naqty josparynda bar. Ony biz qoǵammen ashyq túrde talqylaı otyryp, zaman aǵymyna sáıkes zań jasaqtaımyz", dedi ol.
Osy rette mınıstr jalǵan aqparatty anyqtaıtyn Stop Fake resýrsy jaıynda aıtyp ótti.
"Búginde jalǵan aqparattyń sany kóbeıip ketti. Sondyqtan Stop Fake resýrsy kúndelikti 1-2 jalǵan aqparatty taýyp, ony joqqa shyǵaryp otyrady. Meniń oıymsha, bul resýrs halyq arasynda jaqsy nasıhattalýy kerek. Adamdar osyndaı resýrstyń baryn bilse, aqparattardy ózderi tekserip otyrady", dedi Aıda Balaeva.