Jambyl oblystyq kópbeıindi aýrýhanasynda alǵash ret qoltyq asty lımfa túıinderi arqyly oń jaq keýdege keńeıtilgen sektorlyq rezeksııa jasaıtyn biryńǵaı operasııa jasaldy.
Bul operasııany aýrýhana hırýrgteri joǵary deńgeıde júzege asyrdy. Osy ýaqytqa deıin mundaı kúrdeli otalar tek Almaty qalasyndaǵy Qazaq onkologııa jáne radıologııa ǵylymı-zertteý ınstıtýty men Nur-Sultan qalasyndaǵy Ulttyq ǵylymı onkologııalyq ortalyǵynda ǵana jasalatyn. Endi mundaı múmkindik Taraz qalasynda da týyp otyr.
Oblystyq densaýlyq saqtaý basqarmasynyń málimetinshe, Talas aýdany, Qarataý qalasynyń 46 jastaǵy turǵyny dıspanserlik esepte «Oń jaq sút beziniń karsınomasy, 2-saty» klınıkalyq dıagnozymen tirkelgen. Naýqas adıývantty emes hımııalyq terapııanyń tórt kýrsynan ótip, isikteriniń regressııasy 50 paıyzǵa deıin jetken. Sondyqtan oǵan jedel túrde ota jasaý týraly sheshim qabyldanǵan. Nátıjesinde bilikti de tájirıbeli dárigerler Qaırat Tóleshev pen Jandos Seıdahmetov ıntraoperasııalyq ekspress-sıtologııalyq zertteýdi qoldana otyryp, derttiń oshaǵyn alyp tastaǵan. Dárigerler bul operasııanyń óz nátıjesin beredi dep kútýde.
Oblystyq densaýlyq saqtaý basqarmasy baspasóz qyzmetiniń jetekshisi Tolqyn О́mirbaevanyń bergen málimetinshe, mundaı otanyń basty ereksheligi – sút bezin saqtaýǵa jáne qaterli isiktiń qaıtalanýyn boldyrmaýǵa baǵyttalǵan. Buryn onkologııalyq aýrýlarǵa hırýrgııalyq aralasýdyń basqa tásili qoldanylatyn bolǵan. Bul ádistiń tıimdiligi – qosymsha aýrýdyń aldyn-alýǵa da septigin tıgizetindiginde bolyp otyr. Oblystyq kópbeıindi aýrýhana dárigerleriniń izdenisi men úılesimdi ári tabysty jumysynda sıtologııalyq zerthana qyzmetkerleri Tatıana Sım men radıologııa bóliminiń meńgerýshisi Roza Begimbaevanyń zertteýleri asa mańyzdy ról atqarǵan.
Jambyl oblysy