Bıyl Qazaqstanda qarjy pıramıdalaryna qatysty 37 qylmystyq is qozǵalyp, 18 uıymnyń zańsyz qyzmeti áshkerelendi. Bul týraly Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Qarjy mınıstrligi Qarjy monıtorıngi komıtetiniń Profılaktıkalyq jumys jáne baqylaý basqarmasynyń asa mańyzdy ister jónindegi tergeýshisi Erden Juma aıtty.
Vedomstvo ókili qazir tergeý amaldary jalǵasyp jatqanyn, sondaı-aq elimizde Qylmystyq kodekstiń 217-babyna sáıkes qarjy pıramıdalarynyń qyzmetine tyıym salynǵanyn jetkizdi.
«Joǵarydaǵy qylmystyq faktilerdiń saldarynan adamdar aldanyp, zardap shekken. Olar quqyq qorǵaý organdaryna ýaqtyly habarlaspaıdy nemese aqshany qaıtara alamyn dep úmittenedi. Sondyqtan qazir aldyn alý jumystaryna basymdyq berilip otyr», dedi E.Juma.
Spıkerdiń aıtýynsha, Ákimshilik quqyq buzýshylyq týraly kodekstiń 150-babyna sáıkes, qarjy pıramıdalaryn nasıhattaıtyndarǵa qatysty ákimshilik jaýapkershilik qarastyrylǵan.
Qarjy monıtorıngi komıtetiniń tóraǵasy Janat Elımanovtyń sózine súıensek, 8 aıda uıymdasqan qylmystyq top uıymdastyrýshylary men múshelerine baılanysty 44 qylmystyq is qozǵaldy. Bul sońǵy 5 jyldaǵy eń úlken kórsetkish.
Taldaý arqyly zańsyz qolma-qol aqshamen aınalysatyn 60-tan astam yqtımal qylmystyq top anyqtaldy. Osy maqsatta olar 1200-den astam jalǵan kompanııa quryp, qarjy aınalymy 2 trln teńgeden asqan.
«Barlyq qylmystyq is boıynsha 98 adam kúdikti dep tanylyp, onyń 28-i qamaýǵa alyndy. Taǵy 29-y úıqamaqta otyr. Jalpy, 19 uıymdasqan qylmystyq top quryqtaldy. Sońǵy 5 jylda alǵash ret zańsyz qolma-qol aqshany alý deńgeıi 38%-ǵa azaıdy», dedi J.Elımanov.
Jaýapty organ basshysy bıýdjet qarajatyn jymqyrý faktilerin anyqtaý erekshe nazarda ekenin aıtty. Bul baǵytta Bas prokýratýramen birlesip, «Qazyna» jedel aldyn alý is-sharasy qolǵa alynǵan. Onyń aıasynda bir kúndik fırmalarmen 63 mlrd teńgege turaqty túrde ózara esep aıyrysqan memlekettik satyp alýdyń 90-nan astam kúmándi jeńimpazy anyqtaldy. Osyǵan qatysty 20 qylmystyq is qozǵalyp, qalǵandary boıynsha tekserý jumystary júrgizilýde.
Buǵan qosa komıtet tóraǵasy byltyr jalǵan alkogoldi ónimder shyǵaratyn 50-den astam jerasty sehy joıylyp, zańsyz aınalymnan 1,5 mln-nan astam shólmek, 400 myń lıtrge jýyq spırt, sondaı-aq 500 myń jalǵan esepke alý baqylaý markalary tárkilengenin jetkizdi.
Vedomstvo ókilderiniń derekterine sensek, bıyl 8 aıda 765 zańsyz oıyn mekemesiniń joly kesilip, 22 jasyryn kazıno joıyldy. Oıyn termınaldary, rýletkalar jáne taǵy basqa túrindegi 12 myńǵa jýyq zat tárkilendi.