Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda kóptegen jas qazaqstandyqtar sertıfıkattalǵan maman boldy jáne qaıtarymsyz grant ıelenip, óz kásibin sátti bastaýǵa múmkindik aldy.
Dekrettik demalystan keıin Almaty qalasynyń turǵyny Maqpal Nuraq úıde tigin tigý arqyly tabys tapty. Birde áleýmettik jeliden «Eńbek» memlekettik baǵdarlamasy aıasynda júzege asyrylyp jatqan «Jas kásipker» jobasynyń bastalǵany týraly aqparatty kórip, soǵan qatysýǵa bel býady.
– О́z sheberhanamdy ashýdy burynnan armandadym. Bıznes-josparym daıyn turdy, qandaı jabdyqtar, qandaı materıaldar kerek ekenin jaqsy biletinmin. Tipti qajetti aýmaqty eseptep shyǵardym. Jumyspen qamtý ortalyǵyna baryp edim, olar maǵan oqýǵa, sertıfıkat alýǵa múmkindik berdi. Keshki topta oqyp júrip, jumys isteýge de úlgerdim, – deıdi ol.
Grant alǵan soń Maqpal kıim tigýmen tolyq aınalysýǵa múmkindik beretin jabdyq satyp aldy.
– Jobaǵa qatysý arqyly taýar aınalymy eki esege ósti, qazir maǵan kelip túsetin tapsyrys kóp. Jaqynda taǵy da dekrettik demalysqa shyǵamyn. Sondyqtan tigin kýrstaryn ótkizip, osylaısha ózim sııaqty sapaǵa jumys isteýge tyrysatyn kómekshi tapqym keledi. Ári qaraı, buıyrsa, isimdi keńeıtpek nıettemin, – deıdi Maqpal Nuraq.
Almatylyq Perızat Tátenniń de tabys oqıǵasy osyǵan uqsas. Bul keıipkerimiz de tigin isimen aınalysyp, qazaqstandyq dızaınerlerde jumys istegen jáne aqyrynda óz kásibin ashýǵa sheshim qabyldaǵan.
– «Jas kásipker»jobasyna qatysýǵa birge oqyǵan toptasym keńes berdi. Aıtpaqshy, ol da jobaǵa qatysýshy, alǵashqy aǵymda oqyǵan. Sonymen, grantty alǵannan keıin, ózim úshin jumys istep jatyrmyn, – deıdi Perızat.
Eske salaıyq, osy jyldyń 8 aıynda, Almaty qalasynda «Eńbek» baǵdarlamasyna 32 myńnan astam adam qatysty. Onyń 1306-cy óziniń bıznes ıdeıalaryn júzege asyrý úshin 200 AEK kóleminde memlekettik grant aldy, al 43-ine shaǵyn nesıeler bólindi.
Jalpy, elimiz boıynsha bıyl «Eńbek» baǵdarlamasyna 430 myń adam qatysyp, olarǵa túrli qoldaý sharalary kórsetildi. 279,8 myń adam jumyspen qamtylsa, onyń ishinde 146,7 myń adam turaqty jumysqa kirdi. 159,8 myńnan astam adam sýbsıdııalanatyn jumys oryndarymen qamtyldy. Bıznes-ıdeıalardy damytýǵa jeńildikpen 6 984 mıkrokredıt jáne 20,4 myń grant berildi. 28,4 myń azamat qysqa merzimdi kásipkerlik negizderin oqydy.