Is-sharanyń maqsaty – Qazaqstannyń beıneleý óneri túrleriniń sanalýandyǵyn kórsetý, sonyń ishinde graffıtıdi nasıhattaýǵa negizdelgen.
Strıt-art óneriniń jańa múmkindikteri kórermenderge tarıhı tulǵalarǵa baılanysty qazirgi zaman taqyrybyn tereń ashatyn eń mańyzdy, qundy týyndylardy usynýymen qundy.
Atalǵan perfomansqa elimizdiń birqatar respýblıkalyq jáne halyqaralyq baıqaýlarynyń jeńimpazdary, memlekettik kórmelerdiń qatysýshylary, sýretshi-bezendirýshiler Raıymbek Sákenov pen Aıdos Sheker qatysty.
– Strıt-art – kóshe stılindegi sýret. Sondyqtan mýzeıdegi sýretterden aıyrmashylyǵy – sýretshiler ózderiniń oılaryn keńinen jetkizýge jáne óziniń ishindegi oıdy toqtaýsyz, shekteýsiz jetkizýge múmkindik beretin stıl. Bul óner túri negizinen batystan kelgen. Kezinde sýretshilerge shekteý qoıyp, qıyn jaǵdaı túsken kezde ózderi kóshege shyǵyp, kózqarastaryn jetkizý barysynda osy stıl paıda bolǵan. Sol sebepti elimizdegi biz sııaqty jastardy qoldap otyrǵandaryńyzǵa rahmet aıtamyz, – deıdi Qazaq Ulttyq ýnıversıtetiniń 5-kýrs stýdenti A.Sheker.
Joba aıasynda Ulttyq mýzeı álemdik pandemııanyń áserine qaramastan qalalyq mádenıetti damytý maqsatynda kórkemóner quraldary arqyly kórermenderge Qazaqstan beıneleý óneriniń túrlerin usyndy.
Memlekettik mádenı jobalardy keńinen nasıhattaý jáne iske asyrý aıasynda Abaı Qunanbaıulynyń 175 jyldyǵyna oraı beıneleý óneriniń zamanaýı quraldary perfomans jáne graffıtı arqyly mádenıettiń, tarıhtyń jáne ónerdiń tutastyǵyn kórsetý josparlandy. Ári sýretshiler hakim Abaıdyń mýralyn salýdy bastady.
Aıta keteıik, mýzeıler – Qazaqstan tarıhy men búgingi kúnniń áleýmettik máseleleri kórinis tapqan sýretshilerdiń jumystaryn mádenı ortada nasıhattaıtyn basty alań. Búgingi kúni graffıtıdi memleket pen qoǵam arasyndaǵy qalalyq qatynas quraly retinde qoldanatyn elder sany artyp keledi.