Eńbek jáne halyqty áleýmettik qorǵaý mınıstri Birjan Nurymbetov aǵa býyn ókilderine zor densaýlyq, uzaq ómir, beıbit aspan men baq-bereke tileı otyryp, Qazaqstannyń barlyq zeınetkerlerin Qarttar kúnimen quttyqtady. QR EHÁQM atynan vıse-mınıstr Erlan Áýkenov 78 jastaǵy Raısa Gashenkoǵa kreslo-qolarbany tabystady, dep habarlaıdy Egemen.kz.
"Asa qurmetti zeınetkerler, sizderdi shyn júrekten Qarttar kúnimen quttyqtaımyn! Aǵa urpaq adamdary - otansúıgishtiktiń, adaldyqtyń, úlken shydamdylyq pen jarqyn bolashaqqa senimdiliktiń aıqyn úlgisin kórsetetin elimizdiń altyn qory, danalyq pen dástúrdi saqtaýshylar ekeni anyq. Osy keremet jáne jyly merekede sizderge zor densaýlyq, uzaq ómir, beıbitshilik pen baq-bereke tileımin! Sizderdiń ár kúnderińiz jaqyndaryńyz ben aınalyńyzdaǵy jandardyń meıirimdiligi men súıispenshiligine, qamqorlyǵyna toly bola bersin! Laıym egde jas eńseni túsirmeı, uzaq ta baıandy ǵumyrǵa jetelesin!" - dep quttyqtady qarııalardy Birjan Nurymbetov.
"Sharapat" áleýmettik qyzmet kórsetý ortalyǵynda barǵan Eńbek jáne halyqty áleýmettik qorǵaý vıse-mınıstri Erlan Áýkenov, onda turatyn qarttar men ardagerlerdi quttyqtap, Mınıstrlik atynan 78 jastaǵy Raısa Gashenkoǵa kreslo-qolarbany syılady.
Jınalǵandardy quttyqtaı otyryp, vıse-mınıstr, memleket aǵa býyn ókilderine erekshe kóńil bólip kele jatqandyǵyn atap ótti. Osy jyly "Ardagerler týraly" zań qabyldanyp, aǵa býyn azamattarynyń jaǵdaıyn jaqsartý jóninde 2025 jylǵa deıingi "Belsendi uzaq ómir" ulttyq is-qımyl jospary jasaldy.
"Ony qabyldaý egde jastaǵy azamattardyń qoǵamnyń túrli salalaryna qatysý múmkindikterin keńeıtedi, sondaı-aq olardy memlekettik qoldaýdyń sapaly sharalarymen qamtamasyz etedi. Ulttyq jospar aıasynda ár aımaqta belsendi uzaq ómir súrý ortalyqtaryn ashý josparlanýda", - dep atap ótti Erlan Áýkenov.
Budan buryn habarlanǵandaı, 1 qazanda Qazaqstanda Qarttar kúnine oraı aılyq bastalady. Aǵa urpaq ókilderine qamqorlyq jasaýǵa arnalǵan is-sharalar respýblıkanyń barlyq aımaqtarynda ótedi. Olardyń ishinde ambýlatorııalyq-emhanalyq uıymdarda "Ashyq esik kúnderi" jáne "Júrekten júrekke" qaıyrymdylyq aksııasy uıymdastyrylyp, onyń aıasynda aýyr naýqas qart adamdarǵa azyq-túlik sebetteri tabystalady. Sonymen birge eńbek ujymdarynda kezdesýler jáne taǵy basqa sharalar qolǵa alynady.
Eske sala ketsek, elimizde jasyna baılanysty 2 mıllıonnanastamzeınetkerturady. 2020 jylǵy 1 qańtardan bastap jyl saıynǵy ındeksteý nátıjesinde yntymaqty zeınetaqy mólsheri 7%-ǵa ósip, bazalyq zeınetaqynyń ulǵaıýy 5%-dy qurady. Sonymen qatar, Memleket basshysynyń tapsyrmasyn oryndaý maqsatynda, aǵymdaǵy jyldyń 1 sáýirinen bastap taǵaıyndalǵan zeınetaqy mólsheri qosymsha taǵy 5% ındeksteldi. Bul 2019 jylǵy deńgeımen salystyrǵanda bazalyq zeınetaqynyń 10%-ǵa, yntymaqty zeınetaqynyń 12% -ǵa ósýin qamtamasyz etti.