Oral qalasynda Qazaqstan Jazýshylar Odaǵynyń Batys Qazaqstan oblystyq fılıalynyń jańadan taǵaıyndalǵan tóraǵasy Baýyrjan Halıollanyń jetekshiligimen alǵashqy jıyn ótti, dep habarlaıdy Egemen.kz
Kezdesýge Batys Qazaqstan oblysy ákiminiń orynbasary Serik Egizbaev, Batys Qazaqstan oblystyq mádenıet basqarmasynyń basshysy Saıran Dúısenov, "Qazaqstan salalyq mádenıet, sport, týrızm jáne aqparat qyzmetkerleri kásiptik odaǵy" qoǵamdyq birlestigi oblystyq fılıalynyń tóraǵasy Aıdar Batyrhanov jáne ólkege belgili 30-ǵa jýyq aqyn-jazýshy qatysty.
Baýyrjan Halıolla óz sózinde fılıaldy buǵan deıin basqarǵan aqyn, Memlekettik syılyqtyń ıegeri, Aq Jaıyqtyń aq shaǵalasy atanǵan Aqushtap Baqtygereevamen aqyldasyp, aq batasyn alǵanyn jetkizdi. Odan keıin jergilikti qalamgerler uıymynyń aldynda turǵan jospar-jobamen bólisti. Fılıal tóraǵasynyń aıtýynsha, Qazaqstan Jazýshylar odaǵyna múshe jergilikti qalamgerlerge "Aqjaıyq" shıpajaıyna joldama berilip, Táýelsizdik kúni qarsańynda fılıaldyń arnaıy stıpendııasy tapsyrylmaq eken.
"Búgingi tańda bizdiń qalamgerlerdiń aldynda turǵan eń ózekti másele – kitap shyǵarý. Shyǵarmashylyq adamy kóbinese bul iske ıkemsizdeý keledi, jazýyn jazǵanmen, kitabyn shyǵara almaı, ótkize almaı sendelip júredi. Osy máseleni qolǵa alý úshin odaqtyń fılıaly janynan baspa isin jolǵa qoıýdy oılastyryp jatyrmyz. Odan keıin Aq Jaıyq qalamgerleriniń shyǵarmashylyǵyn nasıhattaıtyn, úsh aıda bir márte shyǵatyn ádebı almanah shyǵarý josparda bar. Oblystyq, qalalyq basylymdarda arnaıy aıdar, áleýmettik jelilerde paraqsha ashyp, barynsha belsendi jumys isteımiz", dedi Baýyrjan Ergenuly.
Bir erekshe jańalyq – Qazaq radıosynyń efırinde "Aq Jaıyq qalamgerleriniń saǵaty" atty aıdar ashylatyn bolypty. Onda batysqazaqstandyq aqyn-jazýshylarymen suhbattar uıymdastyrylyp, shyǵarmalary berilmek. Radıo basshysy Baqyt Jaǵyparulymen bul jóninde aldyn ala kelisimder jasalǵan. Sondaı-aq jergilikti qalamgerlerge "Juldyz" jýrnaly men "Qazaq ádebıeti" gazetin jáne jergilikti basylymdardy jazdyryp berýdi de fılıal óz moınyna alyp otyr.
"Indet jaǵdaıy turaqtalǵan soń aqyn-jazýshylardyń shyǵarmashylyq keshin óziniń týǵan jerinde ótkizýdi qolǵa alǵymyz keledi. О́ıtkeni, shyǵarmashylyq keshter, mádenı sharalar kóbine qalada ótedi de, aýyldy umytyp ketip jatamyz sondaı-aq ózge aımaqta júrgen jerles qalamgerlermen de tyǵyz baılanys ornatý qajet-aq. Mysaly, Batyrbolat Aıtbolatuly, Aıbatyr Seıtaq, Asylan Tilegen, Sherhan Talap, Meńdolla-Jadyra Shamuratovtar jáne basqalar sekildi tamasha qalamgerlerdi qoldap, týǵan ólkesine shaqyryp, halyqpen júzdesý uıymdastyrǵan jón dep oılaımyn. Basqa aımaqta ótetin ádebı-mádenı sharalarǵa oraldyq qalamgerlerdi de kezegimen jiberip, tájirıbe almasyp, barys-kelis qatynas jasap otyrýdyń paıdasy zor", dedi fılıaldyń jańa basshysy.
Osy jıynda batysqazaqstandyq qalamgerlerdiń búgingi aqsaqaly, bıyl 80 jasqa kelgen aqyn Aıtqalı Nárikovke qurmet kórsetildi. Aqyndy fılıal atynan mereıtoıymen quttyqtap, ıyǵyna shapan japqan Baýyrjan Ergenuly qalamgerge quttyqtaý hat pen syı-sııapat tabystady. Sondaı-aq qalamgerdiń 80 jyldyǵyna arnalǵan "Aqjaıyqtyń Aıtqalıy" atty oblystyq jyr músháırasy ótetinin habarlady.
Taǵy bir usynys – qalalyq saıabaq ishinde aqyndar alleıasyn jasap, oǵan osy óńirde týyp-ósken qalamgerlerdiń aty-jóni jazylǵan belgitastar ornatylmaq. Sol jerde ashyq aspan astynda poezııa keshterin, ádebı jıyndardy uıymdastyrý máselesi de uıymdastyrylmaq.
"Bizdiń bul usynystarymyzdyń denin jergilikti basshylar qoldap otyr. Oral qalasyndaǵy aqyn Qasym Amanjolov turǵan úıdi jyl sońyna deıin bizdiń qolymyzǵa beremiz degen ýádesi bar. Buıyrsa ol jer de batysqazaqstandyq qalamgerlerdiń basy jıi qosylatyn rýhanı ortalyq bolady dep oılaımyz", dedi Baýyrjan Halıolla.
Osy jıynǵa qatysqan Batys Qazaqstan oblysy ákiminiń orynbasary Serik Egizbaev fılıal jumysyna sáttilik tilep, qalamger qaýymnyń oń bastamalaryna ákimdik tarapynan árqashan qoldaý bolatynyn aıtty. Batys Qazaqstan oblystyq Mádenıet basqarmasynyń basshysy Saıran Dúısenov óz sózinde jergilikti shyǵarmashylyq odaqtarmen barynsha tyǵyz qarym-qatynasta jumys isteýge múddeli ekenin bildirdi. О́z kezeginde jıynǵa qatysqan Alpamys Bekturǵanov, Tıhon Álipqalı, Zakarııa Sısenǵalı, Saǵyntaı Bısenǵalıev, Baýyrjan Ǵubaıdýllın, Tiles Jazyqbaı jáne basqalary fılıal jumysyn damytý, qalamgerlerdiń shyǵarmashylyq, áleýmettik máselelerin sheshý jaıly oı-pikirimen bólisti.