Oral qalasynda Qazaqstan Respýblıkasynyń eńbek sińirgen qaıratkeri, "Parasat" ordeniniń ıegeri, ánshi Hatımolla Berdiǵalıev Abaı Qunanbaıulynyń mereıtoıyna arnap "О́leńdi qaıtip qoıarsyń" atty jeke konsertin ótkizdi, dep habarlaıdy Egemen.kz
Esimi sýyryp salma aqyndyǵymen de, keń tynysty ánshiligimen de alty alashqa áıgili Hatımolla aǵamyzdyń Abaı toıyna tartýy bıyl mamyr aıynda ótýi tıis bolatyn. Alaıda pandemııanyń kesirinen keri ysyrylyp, kúzge de jetipti.
– Basqa anaý-mynaý kisi bolsa eshteńe emes, alyp tulǵa Abaıdyń júgin arqalap júre berý qıyn boldy. Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń dırektory Ashat Tarasulyna "Jyl aıaǵy da jaqyndap qaldy ǵoı. Halyqty jınaı almasaq, eń bolmasa onlaın konsert ótkizeıik" dep usynys aıttym. Sóıtip, osy konsertti ótkizýge táýekel ettik. Bul meniń jeke ótkizgen sońǵy konsertim bolýy múmkin. О́ıtkeni jasym jetpiske taıap qaldy. Jeke konsert berý ońaı emes, oǵan kóp kúsh, qaırat kerek, – deıdi Hatımolla aǵamyz.
Konsert Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń úlken zalynda, "Serper", "Jubanov kóktemi" jáne Taıvan elinde ótken halyqaralyq festıvalderdiń laýreaty Dáýletkereı atyndaǵy halyq aspaptary orkestriniń súıemeldeýimen ótti. Orkestrdiń kórkemdik jetekshisi jáne bas dırıjeri, "Qurmet" ordeniniń ıegeri, memlekettik "Daryn" jastar syılyǵynyń laýreaty, QR "Mádenıet salasynyń úzdigi" Erkin Nurymbetov te osy konserttiń uıymdastyrylýyna kóp úles qosypty. Osy keshte oryndalǵan biraz ándi orkestrge túsirgen ózi eken.
Abaıdyń "Aıttym sálem qalamqas" ánimen bastalǵan konsertte barlyǵy 20 shyǵarma oryndaldy. Onyń negizgi bóligin – 15 shyǵarmany Hatımolla Berdiǵalıevtiń ózi oryndasa, ánshiniń ónerdegi áriptesteri de qalys qalmady. Nurǵısa Tilendıevtiń "Abaı tabıǵaty" shyǵarmasyn Qazaqstan Respýblıkasynyń mádenıet qaıratkeri Jámıla Nurymbetova jeke qobyzda oryndasa, Ahmet Jubanovtyń "Abaı" sıýıtasyn orkestr Memlekettik "Daryn" jastar syılyǵynyń laýreaty Jaras Satybaldıevtiń dırıjerlik etýimen oınap shyqty. Ahmet Jubanov pen Latıf Hamıdıdiń "Abaı" operasyndaǵy Abaıdyń "Eı, halaıyq" arııasyn Erkin Nurymbetov bastaǵan orkestrdiń súıemeldeýimen "Eren eńbegi úshin" medaliniń ıegeri Aıbar Haıyrhanov halyqqa usyndy.
Birqatar shyǵarmany orkestrdiń qoldaýymen, bir bóligin dombyramen, endi bir parasyn konsertmeıster Galına Andreevanyń súıemeldeýimen oryndaǵan ánshiniń ónerpaz qyry jarqyrap kórindi. Ár shyǵarmanyń sazy men sózi úılesip, oryndaýshynyń júreginen ótip, kómeıinen tógilgen kezde, tyńdaǵan jannyń jan-dúnıesin eriksiz baýrady. Atshaptyrym zalda arnaıy shaqyrýmen kelgen úrkerdeı top qana otyrǵanymen, áleýmettik jelide tikeleı kórsetilgen efırdi Qazaqstannyń túkpir-túkpirinen talaı kórermen tamashalapty.
Bul konsert muǵalimder merekesi qarsańynda ótken edi. Konsert sońynda ánshi óziniń aıaýly ustazyn eske aldy.
"Meniń Abaı ánderimen tanysýym sonaý mektep qabyrǵasynan bastalǵan. Bizge Abaı álemin alǵash tanytqan, Abaıdyń tatymdy jyrlaryn bizdiń tańdaıymyzǵa tatytqan – ustazymyz Faýzııa apaı Ǵaısına bolatyn. Tiri bolsa bıyl 90 jasqa tolar edi. Qaztalovta oqyp júrgen kezimde 5 synyptan bastap klass jetekshi boldy. Tek meniń emes, búkil synyptyń ádebıetke, ónerge oń qaraýyna sol ustazymnyń kóp septigi tıdi. Búgin sizder tyńdaǵan Áblahat Esbaevtyń "О́zgege kóńilim toıarsyń" ánin 5 synypta júrgen kezde eń alǵash úıretken – sol Faýzııa apaı bolatyn. Keıin notasyn taýyp, óńdep, repertýaryma kirgizip aldym. Bul án maǵan Abaıdan, Ábilahattan jáne Faýzııa apaıdan qalǵan estelik boldy. Men búgingi konsertimdi ustazym Faýzııa apaıdyń rýhyna arnaımyn", dedi ánshi tolqyp turyp.
Qazaqstannyń batys óńirindegi dástúrli án mektebiniń iri ókili sanalatyn Hatımolla Berdiǵalıev aǵamyz ár konsertine úlken daıyndyqpen, úlken jaýapkershilikpen keletinin buryn da baıqaıtynbyz. 2012 jyly óziniń 60 jyldyq mereıtoıynda "Aıman-Sholpan" dastanyn 1,5 saǵat boıy jyrlap bergeni esimizde. Ol konsertke ánshi jarty jyl daıyndalǵan eken. Al búgingi konserti joǵaryda aıtqanymyzdaı, bir jylǵa jýyq daıyndyq, qaıtalaýdyń jemisi boldy.
"Baıaǵydan bergi ádetim – úlken sahnaǵa shyǵatyn ýaqytym jaqyndaǵan saıyn alańdap, uıqydan aırylamyn. Bir qyzyǵy, konsert bolatynyn maǵan aldyn ala aıtpasa da ózimnen ózim mazasyzdanyp ketemin. Onyń ústine búgingi konserttiń jóni bólek qoı. Abaıǵa kelgende abaılap kelý kerek! Osy konsertimdi uıymdastyrýǵa, ótkizýge qolǵabys bergen basshylarǵa, áriptesterime, orkestrge myń san alǵysymdy aıtamyn!", dedi ánshi ádemi de áserli án keshiniń qorytyndysynda sóılep turyp.
P.S. Abaı atamyz "ánniń de estisi bar, eseri bar" demekshi, Oralda osyndaı esti ánniń keshi ótti. Bir kezderi aıtysta da jarqyraı kórinip, án men jyrdy qos qanatyndaı alyp kele jatqan Hatımolla Berdiǵalıev osy kezge deıin 30-ǵa jýyq ánshini tárbıelep, daıyndaǵan ulaǵatty ustaz da. Keıingi jastarǵa "esti ánderge úıir bolyńdar!" deýden jalyqpaıtyn aǵamyzǵa uzaq ǵumyr tileımiz!