"Ashyq mıkrofon" formatynda jastarmen ótken kezdesýde Nur-Sultan ákimi Altaı Kólginov elordany odan ári damytý máselelerin talqylady. Bul týraly ol óziniń Instagram paraqshasynda jazdy, dep habarlaıdy Egemen.kz
"Búgin prezıdenttik jastar kadr rezerviniń rezervshilerimen ýrbanıstıka men qala qurylysyndaǵy tásilder, qoǵamdyq keńistikti odan ári keńeıtý jáne qalany qaıta qurý máseleleri talqylandy. Jas urpaqtyń salmaqty tájirıbesi men kózqarasy bar. Memleket basshysynyń bastamasymen qurylǵan kadr rezervine alý olardyń kópshiligi úshin ózindik áleýmettik lıft boldy. Ákimdikke túrli laýazymdarǵa 8 rezervshi jumysqa qabyldandy. Olar jaqsy nátıjeler kórsetýde, deıdi elorda ákimi.
Altaı Kólginovtiń aıtýynsha, osyndaı kezdesýler pikir almasýǵa, halyqtan keri baılanys alýǵa múmkindik beredi. Búgin rezervshiler ekologııany jaqsartýǵa múmkindik beretin júıeli sharalar qabyldaýdyń mańyzdylyǵyn atap ótti. Elordany gazdandyrý Elbasynyń ekologııa men azamattardyń ómir súrý jaǵdaıyn jaqsartý jónindegi kóregen sheshimi bolyp tabylady. Jeke sektordy gazdandyrý jáne JEO-ny gazǵa aýystyrý aýany aıtarlyqtaı tazartýǵa múmkindik beredi. Qazir qalada tútin baıqalady. Gazdandyrý prosesi birneshe jylǵa bólingen, onyń barysynda qala birtindep kómir qoldanýdan ketedi.
"Lastanýdyń taǵy bir faktory-kóliktiń kóbeıýi. Atmosferaǵa shyǵaryndylardy azaıtý úshin qoǵamdyq kólik parkin elektr avtobýstarymen toltyramyz. Jyl basynda osyndaı 100 avtobýs jelige shyqty-olar qorshaǵan ortaǵa shyǵaryndylar bólmeıdi. Taǵy bir partııa osy jyldyń sońyna deıin túsedi, atalǵan jumystardy jalǵastyramyz", deıdi Altaı Kólginov.
Sóz sońynda ákim elordany aýqymdy kógaldandyrý ekologııany jaqsartýǵa da kómektesetinin jáne rezervshilermen mundaı kezdesýlerdi "ashyq mıkrofon" formatynda áli de ótkizetinin atap ótti.