Qazirgi zaman pedagogi qandaı bolý kerek? Bilim berý júıesi kásibı ıkemdilik pen utqyrlyqty, san qyrly shyǵarmashylyq qyzmet pen ózin ózi basqarý, ózin ózi uıymdastyrý jaǵdaıyndaǵy biliktilikti qajet etedi.
Qazirgi jas býyn – elimizdiń keler kúngi kelbeti. Jas býynǵa búgingi oqý úrdisine saı pedagogıkalyq sheberlik qajet. «Pedagogtik sheberlik – daryndy talant emes, úırený, izdenýdiń nátıjesi. Ustazdyq – jan-jaqty bilimdilikti, ıkemdilikti, sheberlikti, meıirimdilikti, erekshe shákirtjandylyqty qajet etetin mamandyq. Birinshiden, muǵalim eńbegi adamzat qoǵamy tarıhynda jınaqtalǵan ǵylym negizderinen bilim berýge tıis bolsa, ekinshiden, únemi shákirtterimen qarym-qatynasta bolyp, bilsem, úırensem degen bala armany men onyń syrly taǵdyryna basshylyq etýdi moınyna alǵan maman. Ol naǵyz ustazdyń ǵana qolynan keledi. Ustaz ataný, ony qadir tutý, qasterleý, aryndaı taza ustaýdy boryshy sanaǵan jannyń biri – «Álkeı Marǵulan atyndaǵy №40 mektep-lıseı» KMM dırektordyń oqý-tárbıe isi jónindegi orynbasary Jumagúl Esil.
Alǵashqy enbek jolyn bastaýysh synyp muǵaliminen bastap, bastaýysh synyptary boıynsha dırektordyń oqý-tárbıe isi jóninde orynbasaryna deıingi bilim berý salasyndaǵy baspaldaqtarynda qajyry men qabiletin shyńdaı otyryp, bıikke umtyldy. Ybyraı, Ahmet, Mirjaqyp salǵan sara joldyń izgilik qaǵıdatyn 33 jylǵy eńbek jolynda boıyndaǵy bilim men aqyl, oı qýatyn birinshi synyp búldirshinderin segiz ret qabyldap, orta býynǵa joǵary sapamen jiberýge, ár shákirtiniń ekinshi anasyndaı árqaısysyna bolashaqqa jol silter aqylshy bolýǵa jumsady. Álem boıynsha oryn alǵan COVID-19 indeti saldarynan elimizde de ustazdarǵa artylǵan júktiń ońaı bolmaǵany anyq. Osy tusta Abaıdyń «Aqyryn júrip, anyq bas, eńbegiń ketpes dalaǵa. Ustazdyq etken jalyqpas, úıretýden balaǵa», degen jyr joldaryndaı zaman aǵymyna tótep berip, mekteptiń tárbıe isin uıymdastyrý men bilimniń jetkilikti, sapaly berilýine de Jumagúl Baltabaıqyzynyń úlesi zor.
2019-2020 oqý jylynda alǵash mektep tabaldyryǵyn attap: «Bilimniń tunyǵyna endi qanamyz ba? Áripti úırenip, tanyp, bilim alamyz ba?» degende Qazaqstan boıynsha karantın engizilip, qashyqtan oqytý bastalǵan tusta Jumagúl Baltabaıqyzy barynsha barlyq balanyń bilim nárine qanyǵýyna jaǵdaı jasap, ár shákirtke sapaly bilim men tárbıeni jan-jaqty, ıaǵnı ZOOM baǵdarlamasy, ýatsap jelisi jáne t.b múmkindikterdi paıdalana bildi. Balalardyń qyzyǵýshylyǵy oıanyp, tipti óz betimen sabaq tapsyrmalaryn oryndaǵanyn kórip, ata-ana retinde tańdanbasqa amalymyz bolmady.
Sondyqtan bilim salasyndaǵy túrli reformalardy basynan ótkerip jatqan Qazaqstannyń ár pedagoginiń eńbegi orasan. Osy tusta «Jańartylǵan bilim berý mazmuny» aıasynda bilim berýdiń basty tetigi bilimdi urpaq tárbıeleýde jańa zaman talabyna saı, quzyretti, kreatıvti pedagogterdiń bilikti de shyǵarmashyl sheber, óz isiniń mamany bolý keregin Bilim jáne ǵylym mınıstri Ashat Aımaǵambetov naqty aıtqan bolatyn.
«Ustaz – jan-jaqty damyǵan bilimdi tulǵa. Sokrat ustazdardy jańbyr tamshysyna uqsatady. Jańbyr tamshylary sepken uryq dánine nár bere alatynyndaı, ustaz da ár oqýshynyń darynyn ushtaı alady. Muǵalimge tán eń birinshi qasıet – balany qurmetteý. Bul – árkimniń qolynan kele bermeıtin, erekshe talantty qajet etetin, baı qııaldy adamǵa tán. Ustaz ártúrli kezdeısoq jaıttardyń týyndap otyratynyn aldyn ala sezip, boljap jáne onyń oń sheshimin tabýǵa daıyn bolýǵa tıis. Árbir shákirt ózine úlgi-ónege bolǵan súıikti muǵalimin ustazym dep ataıdy. Bul – kásibı deńgeıdegi ustazdardyń sapaly bilim men sanaly tárbıe berýiniń nátıjeliligi», deıdi Jumagúl Baltabaıqyzy. Bul – naǵyz ult ustazynyń pikiri. El bolashaǵynyń tutqasy – sapaly, sanaly, bilimdi urpaq tárbıeleıtin Jumagúl Baltabaıqyzy sııaqty muǵalimderdiń qolynda.
Nur-Sultan qalasyndaǵy «Álkeı Marǵulan atyndaǵy №40 mektep-lıseı» KMM 2 «J» synyp ata-analary atynan Meıramgúl KASIMBEKOVA