Bıyl jarty jylǵa deıin sozylǵan indettiń taralýy kezinde elimizde qatty zardap shekken óńirlerdiń biri – Batys Qazaqstan oblysy. Qazan aıynyń basyndaǵy derekterge qaraǵanda, munda 7 myńǵa jýyq adam indet juqtyrǵan. Árıne, olardyń 98 paıyzdan astamy emdelip shyqty. Degenmen, osy aralyqta 109 adamnyń ómirden ótýi halqynyń sany 600 myńnyń ústindegi shaǵyn oblys úshin joǵary kórsetkish.
Eń qynjylarlyq jaıt, búginde aımaqta epıdemııalyq jaǵdaıdyń turaqtalǵanyna qaramastan pandemııany juqtyrǵandar men sonyń saldarynan qaıtys bolǵandar sany tyıylmaı tur. Aıtalyq, 24 qyrkúıek pen 2 qazan aralyǵynda óńirde 18 adam indet juqtyryp, 3 adam qaıtys boldy.
Batys Qazaqstan oblysynyń epıdemııalyq jaǵdaı turaqsyzdyǵy jóninen Atyraý oblysynan keıingi ekinshi orynǵa shyǵýynyń birneshe sebebi bar deýge bolady. Birinshisi, turǵyndar tarapynan oryn alǵan qamsyzdyq, vırýstan saqtaný men qorǵanys sharalarynyń tıisti deńgeıde júrgizilmegeni bolsa, ekinshiden, óńirdiń Reseıdiń shekaralyq aımaqtarymen irgeles ornalasýy da juqpaly derttiń órshı túsýine salqynyn tıgizdi. Alǵashqy ýaqytta indetke shaldyqqandardy emdeýge qajetti dári-dármekter men kereýet sanynyń jetkiliksizdiginen de kóptegen adam ómirmen erterek qoshtasty. Tipti, koronavırýs ınfeksııasyn aıtpaǵanda, Aqjaıyq aımaǵynda vırýsty pnevmonııadan 214 adamnyń ómirmen qoshtasqany qabyrǵany qaıystyrmaı qoımaıdy. Osy oraıda olqylyqtardan tıisti qorytyndy shyǵarylǵany jón sekildi.
Pandemııanyń yqtımal ekinshi tolqynyna ázirlik kezinde Oral óńirinde qandaı qareket jasalýda? Osy saýaldy oblystyq densaýlyq saqtaý basqarmasynyń jańadan taǵaıyndalǵan basshysy, medısına ǵylymynyń doktory Bolatbek Kaıýpovqa qoıǵan edik. Onyń aıtýynsha, oblys turǵyndaryn dárilik zattarmen jáne medısınalyq buıymdarmen jetkilikti túrde qamtý úshin arnaıy turaqtandyrý qory quryldy. Búginde óńir aýmaǵyndaǵy dárihanalarda qajetti preparattardyń bolýy jóninde monıtorıngtik baqylaýlar júrgizý isi qolǵa alynǵan. Bul isti mobıldik qosymshalardyń kómegimen atqarý kózdelgen.
– Dári-dármekterdiń rezervin qalyptastyrý ýaqytyn tórt aı merzimge josparlap otyrmyz. Osy oraıda qajetti preparattardyń 25 túrine densaýlyq saqtaý basqarmasy deńgeıinde suranys berý jóninde kelisim jasaldy. Rezerv oblystyq «Aqjaıyq» ÁKQ arqyly qurylýda. Soǵan sáıkes jabdyqtaý sharttary qazan aıynyń orta sheninde kúshine kiredi dep kútilýde. Qazir oblysta pandemııanyń ekinshi tolqynyna ázirlik deńgeıi 90 paıyz tóńireginde, – deıdi basqarma basshysy.
– KVI-ǵa tótep berý úshin ótken aılarda dári-dármekter satyp alýǵa «SK-Formasııa» JShS-na 488 mln teńgege qosymsha suranystar jiberilgen eken. Qazir 339 mln teńgege preparattar jetkizilgen. Sonymen birge óńirde medısınalyq uıymdardyń qajetti qural-jabdyqtarmen qamtylý deńgeıi de kóńilge qonady. Buǵan deıin oblysta jedel járdemnen kómek suraǵan turǵyndardy qamtý isinde irkilister oryn alǵan bolsa, ony jaqsartýdyń joldary arnaıy uıymdarmen kelisimsharttar jasaý arqyly belgilengen. Buǵan qosa emhanalar janynan jumyldyrylǵan toptar qurý isi qolǵa alynǵan. Olar KVI men vırýstyq pnevmonııaǵa ushyraǵan naýqastar men sozylmaly aýrýy bar jandardy baqylaýǵa almaq. Árıne, joǵary bilimdi dárigerler men orta býyn medısına qyzmetkerleri jetkilikti bolǵan jaǵdaıda ǵana tıisti nátıje bolmaq. Bul rette qosymsha 38 maman qajet bolyp otyr. Búginde bul máseleni sheshý joldary qarastyrylýda, – deıdi sala jetekshileri.
Bul Oral óńirinde pandemııanyń aldaǵy tolqynyna ázirlik qalypty deńgeıde ekeninen habar bere alady. Buǵan qosa qazirgi kezde Oral qalasynda 200 orynǵa arnalǵan modýldi ıneksııalyq aýrýhananyń qurylysy qarqyndy túrde júrgizilýde. Munyń jalpy quny 7,2 mlrd teńgeni quraıdy. Atalǵan arnaıy emdeý orny jyl aıaǵyna deıin paıdalanýǵa berilmek.
Áıtse de aldyn ala boljap bilý óte qıynǵa soǵatyn indetti aýyzdyqtaý ońaıǵa soǵa qoımaıtyny belgili. Osy turǵydan kelgende ázirligi myǵym óńirlerdiń ózi syr berýi múmkin. Sondyqtan densaýlyq saqshylary oıǵa alǵan maqsattarynyń oryndalýyna halyq ta tilekshi.
ORAL