Almatylyq áýesqoı veloshabandoz Damır Kósheev velosıpedke minip Aqtóbege bet aldy. 2200 shaqyrymdy shaıtanarbamen eńserem degen erikti sapar barysynda muqtaj januıalardan shyqqan jetkinshekterge qaıyrymdylyq kómek kórsetýdi kózdep otyr.
Qyzyǵy men qıynshylyǵy qat-qabat mundaı aıshylyq saparǵa shyǵýǵa ekiniń biriniń batyly bara qoımaıtyny belgili. Al Damır úshin bul alǵashqy táýekel emes. Ol jaz maýsymynda «Abaıǵa jol» aksııasy aıasynda aqynnyń týǵan jerine jaıaý sapar shekken. Almatydan týǵan baýyry Dáýlet Kósheevpen birge Semeıge alpys eki kúnde aıaq basqan azamat, bul isin uly oıshyldyń mereıtoıyna qosqan az da bolsa úlesim dep esepteıdi. Onyń sózinshe, kezekti sapardyń máni tipten bólek.
«Jospar boıynsha 5 oblysty velosıpedpen júrip ótýge tıispin. Jol boıy kezdesken aýyl-aımaqtardy aralap, ondaǵy smartfon, planshet sekildi tehnıkalarǵa muqtaj oqýshylardyń tizimin jasaımyn. Al sherý uıymdastyrýshylary tıisti qarajatty jınap, kómekke zárý jandarǵa jiberip otyrady. Saıahattaǵandy janym súıedi. Súıikti isimniń qaıyrymdylyqpen qabysqany tipten tamasha boldy. Jaqsylyq jasaý – men úshin eń abzal is. Budan keıin de osy maqsatta elimizdiń barlyq oblysyn aralaý oıymda bar», deıdi Damır Kósheev.
Aıryqsha jobaǵa demeýshilik tanytqandardyń biri kásipker Qaırat Qudaıbergen. «Berseń balaǵa ber» degen qaǵıdany alǵa ustaǵan azamat, «shetkeri aýyldardaǵy ınternettiń qalaı jumys isteıtinin, balalarǵa qashyqtan bilim alýǵa qandaı jaǵdaı jasalǵanyn bilgimiz keledi» degendi aıtady. Qaıyrymdylyq qanat qaqsa qandaı jaqsy. Mundaı sharalar jurtshylyqtyń nazaryn aýdara otyryp, ıgi isterdiń órken jaıýyna serpin beretini sózsiz.
Al Almatylyq Damır Kósheevke: «jolyń bolsyn, jolaýshy!» degimiz keledi.
ALMATY