"Kentaý transformator zaýyty" AQ óndiris oshaǵynda bir ýaqytta 6 adamnyń jumysyn atqara alatyn, japondyq Yaskawa Motoman dánekerleýshi-roboty iske qosyldy. Aıta ketý kerek, robot dánekerleý sapasyn arttyrýǵa jáne kásiporynnyń ónimdiligin joǵarylatýǵa arnalǵan. Bir dánekerleýshi mamannyń 8 saǵatta atqaratyn jumysyn robot 20 mınýt ishinde oryndap shyǵady, dep habarlaıdy Egemen.kz
Yaskawa Motoman roboty Japonııada oılap tabylǵan. Alaıda Shvesııada qurastyrylyp, Ýkraına memleketinde arnaıy óndiriske laıyqty baǵdarlamasy engizilgen. Robotpen jumys isteý úshin Kentaýdaǵy zaýyttan 3 maman Ýkraına memleketine baryp, arnaıy is-tájirıbeden ótip kelgen. Bolashaqta zaýytty taǵy da osyndaı robottarmen tolyqtyrý josparlanýda. Aıta keterligi, bul dánekerleýshi-robot Qazaqstanda iske qosylǵan eń alǵashqysy bolyp otyr.
Kentaý transformator zaýyty – elektr energetıka, metallýrgııa, mashına jasaý, kólik, munaı-gaz keshenin jáne turǵyn úı-kommýnaldyq sektoryn qosa alǵanda, ekonomıkanyń barlyq salalary úshin jetkiziletin, keń qoldanysqa arnalǵan transformatorlyq jabdyqtarynyń jetekshi qazaqstandyq óndirýshisi. Zaýyt shyǵaratyn ónimder halyqaralyq sapa jáne qaýipsizdik standarttaryna sáıkes keledi. О́tken jyldary zaýyt ónimderiniń tizimi 400-den astam ataýǵa jetti. Transformatorlardyń tehnıkalyq paıdalanýdyń usynylatyn merzimi 25 jyldy quraıdy, biraq, is júzinde durys paıdalaný jáne ýaqtyly servıstik qyzmet kórsetý kezinde transformatorlar úzdiksiz 40-50 jyl jumys isteıdi.
Zaýyttyń ónimi úlken suranysqa ıe jáne Reseı, Qyrǵyzstan, О́zbekstan, Armenııa, Tájikstan elderine eksporttalady. Kásiporyn sapaly transformatorlardy ǵana emes, energııa únemdeıtin transformatorlardy shyǵarady. Jetekshi eýropalyq elderdiń joǵary tehnologııalyq jabdyqtaryn engizý, sondaı-aq zamanaýı oqshaýlaǵysh materıaldardy qoldaný arqyly óndiris oshaǵynyń ónimderi sapa, senimdilik jáne nomenklatýranyń ártúrliligi boıynsha sheteldik uqsas tehnıkalardan edáýir asyp tústi.
Búginde kásiporynnyń negizgi mindetteriniń biri eksporttyq áleýetti arttyrý bolyp tabylady. О́ndiris oshaǵy "Nurly Jol" ınfraqurylymdy damytýdyń memlekettik baǵdarlamasy sheńberinde ónimderdiń eksporttyq áleýetin arttyrýǵa "Qazaqstannyń Damý Banki" AQ tarapynan qosymsha qarjylandyrý aldy. QDB 6%-ben 1,5 mlrd teńge mólsherinde nesıe usyndy.
Kentaý transformator zaýyty 1959 jyldan bastap jumys isteıdi jáne jabdyqty jańartý qajettiligi týyndady, "О́nimdilik 2020" memlekettik baǵdarlamasy sheńberinde QDB-Lızıng tarapynan usynylǵan qarjylandyrýǵa álemniń jetekshi óndirýshilerinen transformatorlar óndirý úshin metall óńdeý stanoktary satyp alyndy. Avtomattandyrylǵan basqarý baǵdarlamalyq jasaqtamasyna negizdelgen bul jabdyq qol eńbegin jeńildetýge, ónimdilikti arttyrýǵa jáne ónimniń ózindik qunyn tómendetýge múmkindik beredi. Memleket kásipkerlerdi, atap aıtqanda, osyndaı damý ınstıtýttary arqyly barynsha qoldaıdy.
Qazir zaýytta 1153 adam eńbek etedi. Sonymen qatar munda polıtehnıkalyq kolledj bar, onda stýdentter dýaldy oqytýdan ótip, sodan keıin bilimderin zaýytta qoldanatyndyǵyn atap ótken jón. Kolledj jyl saıyn 100-den astam maman shyǵarady, olar keıin zaýytta jáne "Alageum Electric" BK HK-da jumys isteıdi.