Atyraýdaǵy Nazarbaev zııatkerlik mektebiniń oqýshylary ǵylymı jobalar daıyndap, ártúrli saıystarǵa qatysyp júr. Solardyń qatarynda 8 synyp oqýshylary Dilnaz Múbarak pen Ázıza Abatova da bar.
Olar buǵan deıin respýblıkalyq «Zerde» ǵylymı-zertteý jumystar men shyǵarmashylyq jobalar baıqaýynda bas júldege ıe bolǵan edi.
Jaqynda ǵylymǵa bet burǵan jas órender taǵy bir belesti baǵyndyrdy. Bul joly olar Reseıde ótken V.Kýrbatov atyndaǵy oqýshylardyń halyqaralyq ǵylymı jobasyna onlaın rejimde qatysty. «Hımııa: ǵylym men óner» atty ǵylymı jobalar konkýrsyna «Apelsın qabyǵynan tyńaıtqysh ázirleý» taqyrybyndaǵy zertteý jumysyn usyndy.
Oqýshylar daıyndaǵan ǵylymı jobany reseılik qazylar alqasy joǵary baǵalady. Sóıtip, jas ǵalymdar Ázıza men Dilnaz úshinshi dárejeli dıplom men sertıfıkatqa ıe boldy. Al olardyń ǵylymı jańalyǵy V.Kýrbatovtyń 142 jyldyǵyna oraı jaryq kórgen halyqaralyq ǵylymı eńbekterdiń jınaǵyna endi.
Atyraý oblysy