Beınekonferensııa rejiminde Qazaqstan men Mońǵolııa arasynda kezekti simaralyq saıası konsýltasııalar ótti, dep habarlaıdy Egemen.kz SIM baspasóz qyzmetine silteme jasap.
Taraptar 2019 jyly qazanda Mońǵolııa premer-mınıstriniń Qazaqstanǵa jasaǵan resmı sapary qosymsha serpin bergen eki el arasyndaǵy jan-jaqty yntymaqtastyqtyń qarqyndy damýyn qanaǵattanýshylyqpen atap ótti.
Is-shara barysynda nyǵaıyp kele jatqan saýda-ekonomıkalyq is-qımylǵa erekshe mán berildi. Syrtqy saıası mekemelerdiń ókilderi bıyl Qazaqstan-Mońǵolııa úkimetaralyq komıssııasynyń 8-shi otyrysyn ótkizý mańyzdylyǵyn rastady. Budan basqa, eki el arasyndaǵy shart-quqyqtyq negizdi odan ári keńeıtý máseleleri talqylandy.
Konsýltasııa aıasynda taraptar mádenı-gýmanıtarlyq yntymaqtastyqty odan ári damytýǵa degen umtylysty rastady. Qazaqstan tarapy Mońǵolııadaǵy etnıkalyq qazaqtarǵa kórsetilip otyrǵan qoldaý úshin mońǵol tarapyna alǵys bildirdi.
Bizdiń elimizdiń kópjaqty formatta, onyń ishinde Birikken Ulttar Uıymy, Azııadaǵy ózara senim jáne yqpaldastyq sharalar keńesi, Atom energııasy jónindegi halyqaralyq uıym jáne t.b. sheńberinde ózara is-qımyl jasaý máseleleri kelissózderdiń bólek taqyryby retinde talqylandy. Dıplomattar halyqaralyq uıymdar aıasynda ózara qoldaý úrdisin jalǵastyrý, sondaı-aq halyqaralyq sahnadaǵy Nur-Sultan men Ulan-Batyrdyń bastamalaryna elderdiń belsendi qatysýdyń mańyzdylyǵyn atap ótti.
Is-sharaǵa SIM Azııa-Tynyq muhıt óńiri departamentiniń dırektory N.Arystanov, Mońǵolııadaǵy QR Elshisi J.Ádilbaev, Mońǵolııa SIM Azııa jáne Tynyq muhıt departamentiniń dırektory E.Sarantogos, sondaı-aq QR-daǵy Mońǵolııa Elshisi L.Battýlga qatysty.