Búgingi tańda Jambyl oblysynda azyq-túlik baǵasyn turaqtandyrý maqsatynda birqatar jumys júrgizilip jatqanymen, kópshilik kúndelikti tutynatyn taýarlardyń baǵasy birshama ósken.
Oblystyq aýyl sharýashylyǵy basqarmasynyń málimetinshe, birinshi surypty un baǵasy 1,3%-ǵa, jumyrtqa 1,4%-ǵa, kúnbaǵys maıy 0,7%-ǵa qymbattaǵan. Jalpy, jyl basynan beri un baǵasy 9,6%-ǵa, qaraqumyq 30,9%-ǵa, nan 1,5%-ǵa, kartop 16,1%-ǵa kóterilgen. Baǵasy ósken áleýmettik mańyzdy azyq-túlik taýarlarynyń qatarynda sıyr eti, jumyrtqa, sary maı, qant, tuz, aıran, sút sııaqty taǵam túrleri de bar. Qazirgi kezde Taraz qalasyndaǵy dúkenderde bir bólke nan – 55, qanttyń kılosy 190, al kúrishtiń kılosy – 240 teńgeden satylýda.
Alaıda áleýmettik dúken ıeleri qaraqumyq sııaqty keıbir taýarlardyń baǵasyna syrttan jetkiziletin ónimniń ózindik quny áser etip otyrǵanyn aıtady. Al oblystyq aýyl sharýashylyǵy basqarmasynyń qyzmetkeri Tuńǵysh Januzaqovtyń aıtýynsha, maýsymaralyq kezeńde áleýmettik mańyzdy azyq-túlik taýarlarynyń ishinde un, makaron, nan jáne et baǵalary turaqsyz bolýy múmkin. Búginde óńirdegi taýar baǵalaryna monıtorıng júrgizý maqsatynda 4 mobıldik top qurylǵan. Iаǵnı baǵany turaqtandyrý úshin jumys atqarýda. Atalǵan top Taraz qalasyndaǵy negizgi 12 iri saýda ornyn qamtıdy. Sonymen qatar tekseris toby oblys aýdandarynda da jasaqtalýda.
Qazirgi kezde óńirdegi turaqtandyrý qorynda 1633,7 tonna taýar bar eken. Sondaı-aq kelisim boıynsha 2364,3 tonna taýar jınaqtalǵan. Al aldyn ala jasalǵan kelisimshart boıynsha kúndelikti suranysqa sáıkes 1378 tonna qor bosatylatyn bolady. Onyń ishinde 335 tonna nan, 520 myń dana jumyrtqa, 3,2 tonna tuz, 22 tonna taýyq eti jáne 24 tonna sút bar. Sol sııaqty bıyl qyrkúıek aıynan bastap 470 tonna kartop, 332 tonna pııaz jáne 191 tonna sábiz bosatylǵan.
«Taraz qalasyndaǵy negizgi saýda oryndarynan arnaıy áleýmettik sóreler ashyldy. Áleýmettik 6 dúńgirshek turaqty jumys isteýde. Munda jyl basynan beri 872,8 tonna taýar naryq baǵasynan 8-20 paıyz aralyǵynda tómen baǵadan ótkizildi», deıdi T.Januzaqov.
Endi 60 tonna kúnbaǵys maıy, 60 tonna qaraqumyq, 3 myń tonna birinshi surypty un, árqaısysy 100 tonnadan kartop pen pııaz qoryn jınaqtaý sharalary josparlanyp, memlekettik satyp alý konkýrsy jarııalanǵan. Sonymen qatar Jambyl oblysy aýmaǵyndaǵy 9 kásipkerlik nysanyna 1 mlrd teńge kóleminde bıýdjettik nesıe berilgen. Atalǵan qanatqaqty joba óńirdegi kásipkerlerge qaryz berý tetigi aıasynda júzege asyrylyp otyr. Búgingi jaǵdaı boıynsha kásipkerlik seriktesteri arqyly 694,4 mln teńgege 2169 tonna áleýmettik azyq-túlik alynǵan. Endi baǵany turaqtandyrý jáne jergilikti turǵyndardy qajetti qormen qamtamasyz etý maqsatynda qaryz berý tetigi odan ári óz jalǵasyn tabady. Turaqtandyrý qoryndaǵy qarajat esebinen aldyn ala konkýrstyq irikteýden ótken 14 jergilikti taýar óndirýshiniń tizbesi oblystyq komıssııanyń kezekti otyrysynda aıqyndalǵan. Qazirgi tańda olarmen qaryz berý týraly kelisimsharttyń jobasy kelisilgen.
Qazirgideı kúrdeli kezeńde baǵanyń turaqtylyǵy kópshilik úshin mańyzdy bolyp otyr. Sol úshin arnaıy qurylǵan jyljymaly toptyń túsindirý jumystarynyń nátıjesinde tıisti toptarǵa áleýmettik mańyzy bar azyq-túlik taýarlaryna qosylatyn ústemeaqyny 15 paıyzdan asyrmaý kerek ekeni aıtylǵan. Sonymen qatar iri saýda jelilerindegi áleýmettik taýarlarǵa qosylatyn ústemeaqynyń kólemi 6-10 paıyz aralyǵynda bolýy kerek eken.
Jambyl oblysy