Búgin, 18 qarasha kúni Almatyda KSRO jáne Qazaqstan halyq ártisi, asa tanymal opera ánshisi Ermek Serkebaevpen qoshtasý rásimi boldy. Áıgili ánshini sońǵy saparǵa shyǵaryp salýǵa arnalǵan qaraly mıtıng onyń ózi kóp jyldar eńbek etken Abaı atyndaǵy opera jáne balet teatrynyń ǵımaratynda ótti. Bul týraly NewTimes.kz aqparat agenttigi habarlady.
Almaty qalalyq ákimdigi baspasóz qyzmetiniń málimeti boıynsha, qaraly mıtıngide qala ákimi Ahmetjan Esimov Memleket basshysy Nursultan Nazarbaevtyń kóńil qosyn bildirgen jedelhatyn oqyp berdi. Onda Ermek Serkebaevtyń eńbegi elimizdiń án óneri tarıhynda, al esimi halyqtyń júreginde máńgi qalatyny aıtylǵan. Elbasy kóńil aıtýyn oqyp turyp A.Esimov: «Daýysy qandaı ásem bolsa, jany da sondaı sulý onyń oryndaýyndaǵy qazaqtyń halyq ánderi men álemdik opera týyndylaryndaǵy basty arııalar tyńdaýshylardyń janyn árdaıym nurǵa bóleıtin», – dedi. Sońynan jedelhatty ártistiń uly Baıǵalı Serkebaevqa berdi.
Mádenıet jáne aqparat mınıstri Muhtar Qul-Muhammed barynsha baıandy ómir súrip, úlken jetistikterge jetken Ermek Serkebaevtyń artynda óshpes iz qaldyrǵanyn, talantty balalar ósirip shyǵarǵanyn, kóptegen shákirt daıyndaǵanyn atap ótti.
Bul kúni Ermek Serkebaevtyń týǵan-týystaryna kóńil aıtý úshin sondaı-aq Bıbigúl Tólegenova, Asanáli Áshimov, Ermek Amanshaev, Jánııa Áýbákirova, Marat Bısenǵalıev syndy kóptegen óner qaıratkerleri, ártister men ánshiler, sondaı-aq ánshiniń talantyna tabynýshy jurtshylyq keldi.
Ermek Serkebaev 2013 jyly uzaqqa sozylǵan naýqastan keıin jasy 88-ge qaraǵan shaǵynda ómirden ótti.
Murat Aıtqoja.