Shymkent qalasynyń M.Áýezov atyndaǵy Ońtústik Qazaqstan memlekettik ýnıversıtetinde eki kún boıy respýblıkalyq pikirsaıys ótti.
Dástúrli Nur Otan partııasynyń aýyspaly kýbogine arnalǵan XVIII respýblıkalyq pikirsaıys týrnırine elimizdiń túkpir-túkpirinen 36 komanda qatysty. Jas Otan jastar qanaty men Ulttyq pikirsaıys federasııasy uıymdastyrǵan saıys brıtandyq jáne amerıkalyq parlamenttik formatta ótti. Qatysýshylar jalpy júlde qory 2 mln teńge úshin baryn saldy.
Ulttyq pikirsaıys federasııasynyń prezıdenti Bolat Buharbaı dástúrli týrnırdiń basty maqsatyna toqtala kele, atalǵan salada urpaqtar sabaqtastyǵy jaqsy jolǵa qoıylǵanyn basa aıtty.
«Pikirsaıys týrnıriniń maqsaty – óz oıyn emin-erkin, naqty ári dáıekti jetkize alatyn, talantty, bilimdi jastardy qoldaý. Bul – partııa tarapynan qoldaý tapqan kezekti 18-týrnır. Muny pikirsaıys salasyndaǵy úlken jetistik deýge bolady. Sharanyń qurmetti qonaqtary qatarynda týrnırge on jyl buryn qatysqan aǵa býyn ókilderiniń qatysýy – urpaqtar sabaqtastyǵynyń aıqyn kórinisi», dep atap ótti B.Buharbaı.
Týrnırdiń aqtyq kezeńine jetkenge deıin qatysýshylar óńirlerde irikteýden ótken. M.Áýezov atyndaǵy OQMÝ «Aqıqat» debat klýbynyń múshesi Aqerke Ermuhan týrnır sanıtarlyq talaptarǵa sáıkes ótkenin atap ótti. «Elimizdiń túkpir-túkpirinen pikirsaıysshylar jınalyp, ózekti taqyryptar boıynsha óte qyzyqty pikirtalas ótkizdi. Fınalda spıkerler turmystyq zorlyq-zombylyqqa qarsy is-qımyldyń tıimdi tetikterine qatysty pikir talastyrdy. Bul alańda aıtylǵan ıdeıalar men usynystardy zorlyq-zombylyq statıstıkasyn azaıtý úshin paıdalanýǵa bolady», dedi A. Ermuhan.
Jastar «Shved modeli» tıimdi me?», «Onlaın oqytýdy turaqty tájirıbege aınaldyrǵan durys pa?» «Praımerızdiń nátıjesi qandaı?» degen sekildi ózge de ózekti máseleler tóńireginde pikirlerin aıtyp, utymdy oılaryn ortaǵa saldy.
Jas Otan jastar qanatynyń jetekshisi Elnur Beısenbaev Shymkent qalasynda ótken fınalǵa elimizdiń eń myqty pikirsaıys komandalary kelgenine senimdi.
«Jastar arasyndaǵy pikirsaıysqa praımerız, turmystyq zorlyq-zombylyq, sýısıd sekildi 12 ózekti taqyryp alyndy. Biz osy máselelerdi sheshýde jastardyń pikirin eskerý mańyzdy ekenin túsinýimiz kerek. Pikirsaıys – ymyraǵa kelýdiń jaqsy quraly. Praımerız kezinde kópshilik aldyndaǵy pikirsaıystar osyǵan dálel boldy. Sondaı-aq bul týrnır ozyq oıly jastardy qoldaýǵa yqpal etedi», dedi Jas Otan jetekshisi.
Jeńimpazdardy Shymkent qalasy ákiminiń birinshi orynbasary Shyńǵys Muqan, M.Nárikbaev atyndaǵy QazMZÝ basqarma tóraǵasynyń orynbasary Erbolat Muhamedjan, Shymkent qalasynyń Nur Otan partııasy tóraǵasynyń orynbasary Muratáli Qalmuradov, Jas Otan jastar qanatynyń jetekshisi Elnur Beısenbaev jáne Ulttyq pikirsaıys federasııasynyń prezıdenti Bolat Buharbaı marapattady.
«Úzdik tóreshi» atalymyn «Aqıqat» pikirsaıys klýbynyń ókili Shiderbaı Ábdisattar ıelendi. Petropavl qalasynyń «Imperator» fraksııasy «Belsendi qatysýshy» atalymyna jáne 100 myń teńge kólemindegi sertıfıkatqa ıe bolsa, úshinshi oryn men 200 myń teńge júldeni Almaty qalasynyń Qazaq lıgasynda «KN» komandasy jáne orys lıgasynda Kókshetaý qalasynyń «Vagabýnd» komandasy aldy. Al ekinshi oryn men 300 myń teńge kólemindegi sertıfıkatty qazaq jáne orys lıgalarynda da Nur-Sultan qalasynyń pikirsaıysshylary utyp aldy. Qazaq lıgasynda birinshi orynǵa Almaty qalasynyń «Praımerız» toby, orys lıgasynda «Pavlodar» toby ıelenip, 400 000 teńge kólemindegi júldege ıe boldy. Sondaı-aq «Praımerız» komandasynyń pikirsaıysshysy Jarylqasyn Saqtaǵan «Úzdik spıker» atandy.