«Jas Ulan» biryńǵaı balalar men jasóspirimder uıymy» respýblıkalyq qoǵamdyq birlestigi 17 qazanda «ReStart» jobasy aıasynda jastar men balalar arasynda ınternetke táýeldiliktiń aldyn alý maqsatynda «Offlaın kún» respýblıkalyq aksııasyn ótkizdi.
Atalǵan sharanyń basty maqsaty – bir kúndi ınternetsiz ómirge arnap, ýaqytty tıimdi ótkizý. Sonymen birge uıymdastyrýshylar tabıǵat aıasynda oıyndar oınap, jasóspirimderge adamdarmen qarym-qatynas mádenıetin qalyptastyrý jáne jastardyń sanasyn paıdaly baǵytqa qaraı ózgertýdi kózdeıdi.
Is-shara respýblıkanyń barlyq óńirinde bir kúnde ótti jáne barlyq qatysýshy sharanyń sońyna deıin uıaly telefondarynan, áleýmettik jelilerden bas tartyp, bir kúndi tolyǵymen ınternetsiz ótkizdi.
Qatysýshylar sapaly ýaqyt ótkizý úshin tabıǵat aıasyna shyqty. Barlyǵy qyzyq oıyndar oınap, jylyjaılarda baqsha daqyldaryn egip, ártúrli sýretter salyp, úı kınoteatryn uıymdastyrý sekildi jumystarmen aınalysty. Sondaı-aq shara barysynda qart adamdarǵa kómek kórsetip, qaıyrymdy is jasady.
Aksııa aıaqtalǵannan keıin qatysýshylar «Offlaın ómir» marafonyna qatysa alady. 21 kúnge sozylatyn «Offlaın ómir» marafonynda elimizdiń bedeldi tulǵalary qatysýshylarǵa ózderiniń arnaıy tapsyrmalaryn beredi jáne marafon sońynda úzdikterge baǵaly syılyqtar tabystalady.
«Offlaın kún» aksııasy «Jastar men balalar arasynda ınternetke táýeldiliktiń aldyn alý boıynsha is-sharalar keshenin iske asyrý, sondaı-aq azamattardyń sıfrlyq bedelin qorǵaý» taqyrybynda «ReStart» jobasy aıasynda Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» KeAQ granttyq qarjylandyrýy aıasynda ótkizildi.
Jastar uıymy marafonmen shektelip qalmaı, ınternet táýeldiliktiń zııanyn jetkizý úshin arnaıy fotokórme uıymdastyrylyp otyr. Shara 14-23 qazan aralyǵynda respýblıkanyń 17 aımaǵynda ótedi.
«Is-sharanyń negizgi maqsaty – qoǵamǵa ınternetke táýeldiliktiń zııanyn kórsetý jáne ınternetke táýeldiliktiń aldyn alyp, fotosýretter arqyly adamdardyń sanasyn paıdaly jaqqa qaraı ózgertý. Oǵan qosa ǵalamtor mádenıetin túsindirýdi de jolǵa qoıyp otyrmyz», deıdi uıymdastyrýshylar.
Fotokórmede bıyl 1 qyrkúıekte jarııalanǵan baıqaýda úzdik dep tanylǵan sýretter qoldanylady. Fotokórme sýretterin @restart_social paraqshasynan kórýge bolady.