Koronavırýs balalar úshin de qaýipti. Elorda ákimdiginiń Instagram jelisindegi resmı paraqshasynda №1 qalalyq kópsalaly balalar aýrýhanasynyń joǵary sanatty pedıatry Ásel Shaımerdınova aýrýdyń barysy jáne onyń balaǵa tıgizetin zardaptary týraly aıtyp berdi, dep habarlaıdy Egemen.kz
"COVID-19 eresekterge de, balalarǵa da qaýipti, sebebi bul jańa ınfeksııa. Birinshi tolqyn kórsetkendeı, balalar eresekterge qaraǵanda az aýyrdy, olar úshin aýrý jeńil ótedi. Biraq eger ekinshi tolqyn bolsa, odan ári ne bolatynyn kóremiz. Damý aqaýlary, endokrındik buzylýlar, allergııalyq aýrýlar, onkologııalyq patologııa, ımmýnıtet tapshylyǵy jaǵdaıy sııaqty ilespe aýrýlary bar balalardyń koronavırýs ınfeksııasyna tótep berýi deni saý balalarǵa qaraǵanda qıyn bolady", dep eskertti pedıatr.
Balalar sonymen qatar COVID-19 tasymaldaýshysy bolyp tabylady jáne olardyń KVI belgilerinde erekshelik joq: joǵary temperatýra, konıýnktıvıt, bulshyqet aýyrýy, asqazan-ishek joldary buzylysy.
Alaıda, ata-analarǵa balanyń aýrýdan keıingi jaǵdaıyna nazar aýdarý usynylady, óıtkeni mýltı qabyný sındromy paıda bolýy múmkin.
"Mýltı qabyný sındromy qazirgi kezde óte ózekti másele. Bul COVID-19-ǵa aǵzanyń keshikken ımmýnologııalyq jaýaby. Aýrý túri sımptomdy nemese sımptomsyz bolǵany mańyzdy emes. Eki-úsh aptadan keıin joǵary temperatýra, bórtpe, konıýnktıvıt, lımfa túıinderi, alaqan men aıaqtyń isinýi paıda bolady, muny biz baladan syrttaı baıqaı alamyz", dep atap ótti Ásel Shaımerdınova.
Bul jaǵdaıda, onyń aıtýynsha, birqatar tekserýler júrgizý jáne belgili bir em taǵaıyndaý úshin mindetti túrde aýrýhanaǵa jatqyzý qajet.
Tikeleı efırdiń tolyq nusqasyn elorda ákimdiginiń Instagram jelisindegi resmı paraqshasynan kórýge bolady.