Qarjy monıtorıngi komıtetiniń Shymkent qalasy boıynsha ekonomıkalyq tergeý departamentiniń qyzmetkerlerimen júrgizilgen jedel-izdestirý sharalarynyń nátıjesinde kórineý jalǵan esepke alý-baqylaý markalary jabystyrylǵan alkogol ónimderin daıyndaýmen aınalysatyn jasyryn sehtyń qyzmeti toqtatyldy. Bul týraly Qarjy monıtorıngi komıtetiniń baspasóz qyzmeti málim etti, dep habarlaıdy Egemen.kz
Tekserý barysynda kórineý jalǵan esepke alý-baqylaý markalary jabystyrylǵan 18 túrli alkogol ónimderiniń 6671 bótelkesi, 15 tonna spırt, 67 esepke alý-baqylaý markasy, suıyqtyqtardy aralastyratynsorǵy, alkogol ónimderine arnalǵan 146 bos qorap jáne 750 bos bótelke, 500-den astam qaqpaqsha jáne 40 625 teńge aqsha qarajaty anyqtalyp, tárkilengen. Daıyndalǵan alkogol ónimderiniń ári qaraı Shymkent qalasynyń azyq-túlik dúkenderine ótkiziletindigi anyqtaldy.
Atalǵan derek boıynsha QR QK-niń 233-babynyń 2-bóligimen sotqa deıingi tergep-tekserý isi bastaldy (kórineý jalǵan esepke alý-baqylaý markalaryn qoldaný jáne ótkizý). Qazirgi ýaqytta, qylmystyq is sheńberinde osy iske qatysy bar barlyq tulǵalar anyqtaldy, tıisti saraptamalar men tergeý amaldary júrgizilýde.