Bilim alýǵa umtylǵan oqýshylardy qoldaýshylar kóp. Solardyń qatarynda halyqaralyq «MINIBOSS» bıznes-mektebi de bar. Jaqynda Atyraýdaǵy Nazarbaev zııatkerlik mektebiniń bes oqýshysy atalǵan mekteptiń bilim grantyna ıe boldy.
Kásipkerliktiń álippesin tereńirek tanytýdy maqsat etken oqý ornynda Nazarbaev zııatkerlik mektebiniń oqýshylary bir jyl tegin bilim alady. Daryndy balalardyń bıznes-jobasyn daıyndaýǵa Qazaqstan men Ulybrıtanııanyń osy saladaǵy jetekshi mamandary qoldaý kórsetýdi kózdep otyr.
– Sońǵy úsh jyl boıy «MINIBOSS» Qazaqstandaǵy jastardyń kásipkerlik áleýetin arttyrýdy qolǵa aldy. Al Atyraýda bıyl jumysyn bastaǵan mektep óńirdegi jas ónertapqyshtardyń bastamasyn qoldaýǵa nıet bildirdi. Halyqaralyq bıznes-mekteptiń qoldaýyna alǵashqylardyń qatarynda ıe bolǵan Nazarbaev zııatkerlik mektebiniń bes oqýshysy – bilim uıasyndaǵy konkýrstarda kózge túsken, áleýmettik qoldaýdy qajet etetin otbasynyń balalary, – deıdi bıznes-mekteptiń dırektory Lılıana Hegaı.
Onyń aıtýynsha, atalǵan oqý ornyn Eýropalyq bıznesti damytý qaýymdastyǵy qarjylandyrady. Qazir zııatkerlik mekteptiń bes oqýshysyna 7500 eýro kólemindegi bilim granty bólindi. Oqýshylar teorııalyq bilimdi túrli oıyndar, tájirıbeler negizinde meńgeredi. Keıin ózderiniń jobasyn ınvestorlar aldynda qorǵaıdy. Oqýshylar usynǵan ıdeıa sátti bolsa, keıin ulttyq chempıonatta baq synaıdy. Sondaı-aq jobany ári qaraı qarjylandyrý joly qarastyrylatyny belgili boldy.
– Maqsatymyz – álemniń 15 elinen bıznestegi jastardyń bas qosatyn aqtyq saıysyna joldama alý. Oǵan qatysý úshin tynymsyz eńbektený kerek. Qazir oqýshylar óz jobasyn daıyndaýdy bastady, – deıdi halyqaralyq «MINIBOSS» bıznes-mektebiniń dırektory Lılıana Hegaı.
Atyraý oblysy