Úkimettiń búgingi otyrysynda Túrkistan qalasynyń bas jospary jobasy qaraldy jáne maquldandy, dep habarlaıdy Egemen.kz
"Elbasy Nursultan Ábishuly Nazarbaevtyń tarıhı sheshiminiń arqasynda qasıetti Túrkistan qalasy – búkil túrki áleminiń mádenı-rýhanı astanasy retinde órkendeýine úlken serpin berildi. Qazirgi tańda Túrkistan – elimizdiń rýhanı jańǵyrýynyń sımvolyna aınalýda. Memleket basshysy Qasym-Jomart Toqaev Túrkistan qalasynyń damýyna úlken nazar aýdarady", dep atap ótti Premer-Mınıstr Asqar Mamın.
Úkimet basshysy Túrkistannyń jańadan damýyn, tarıhı qundylyqtardy saqtaı otyryp, odan ári kórkeıýin qamtamasyz etý maqsatynda 2018 jylǵy qyrkúıekte Túrkistan qalasyn damytýdyń bas josparynyń tujyrymdamasy maquldanǵanyn eske saldy.
"Qysqa merzimde naqty jumys atqaryldy. Túrkistan qalasynyń mádenı-rýhanı jáne ákimshilik-iskerlik ortalyqtarynyń, kólik jáne ınjenerlik ınfraqurylymy, turǵyn úıler aımaǵynyń qurylysy qarqyndy júrgizildi. Jalpy, oblys ortalyǵy Túrkistan qalasyna kóshirilgennen beri qalanyń negizgi kapıtalǵa ınvestısııalar kólemi – 400 mlrd teńgeni qurady. Jańa bas josparǵa sáıkes qala aýmaǵy birshama ulǵaıdy – 3 myń gektarǵa jýyq. Sonymen qatar, qala turǵyndarynyń sany 176 myńǵa deıin ósti, 2025 jylǵa qaraı qala halqynyń sany 250 myńǵa deıin, al 2035 jylǵa qaraı 350 myńǵa deıin jetetin bolady", deıdi Asqar Mamın.
Úkimet basshysynyń aıtýynsha, tez ósip kele jatqan qalanyń barlyq muqtajdyǵy Túrkistan qalasyn damytý boıynsha usynylyp otyrǵan josparda eskerilgen. Ol qala turǵyndary men onyń qonaqtary úshin tolyqqandy jaıly orta qurýǵa múmkindik beredi.
"Usynylǵan jospar qalanyń jáne Túrkistan oblysynyń atqarýshy organdarymen jáne de ortalyq memlekettik organdarmen kelisilgen. Qala ınfraqurylymyn damytýdyń tıisti shemalary ázirlengen. Jospardy qabyldaý – Túrkistan qalasynyń aldaǵy ýaqytta damýynyń naqty baǵytyn belgileıdi. Sondyqtan usynylyp otyrǵan jospar jobasyn qoldaýdy jáne Úkimettiń tıisti qaýlysyna daýys berýdi usynamyn", dedi Asqar Mamın.
Eske sala keteıik, Túrkistan oblysynyń ákimi О́mirzaq Shókeev Úkimet otyrysynda qalanyń damý barysyn baıandaǵan edi.