Keshe velosporttan álemdegi eń mańyzdy úsh iri jarystyń biri sanalatyn «Ispanııa Výeltasy» grand-týrynyń bıylǵy básekesi aıaqtaldy. Sondaı-aq velosportshylar da bıylǵy maýsymdy dál osy velojaryspen qorytyndylady. Endi úzdikter jyl sońyna deıin eshbir jarysqa qatyspaı, jańa jyldan bastap kelesi maýsymǵa daıyndyqtaryn bastaıdy. Al jas sportshylar ózin kórsetýi úshin áli de shaǵyn týrnırlerde baq synap, kózge túsýdi kózdeıdi.
Italııa tas joldarynda ótken «Djıro d’Italııa» dodasynda «Astana» velokomandasynyń birde-bir sportshysy kezeń jeńimpazy atanbasa da, jarys qorytyndysy boıynsha eń úzdik 10 velosportshynyń qatarynan kóringen-di. Al «Ispanııa Výeltasynyń» 18-kezeńinde qazaqstandyq komandanyń bir sportshysy kezeń jeńimpazy atanyp, toǵyzy ár kezeń saıyn úzdik ondyqtyń qatarynan kórinse de, jalpy jarys qorytyndysy boıynsha eshbir sportshymyz úzdikter qataryna ene almady.
Dese de 75 jyldyq tarıhy bar áıgili dodada talaı myqty veloshabandozdarmen bir qatarda óner kórsetip, bir kezeńde myqtylardyń arasynan sýyrylyp shyǵyp, kezeń jeńimpazy atanýdyń ózi úlken jetistik dep esepteımiz. Onyń ústine «Astana» velokomandasy Ispanııaǵa eń negizgi quramyn emes, álemdik deńgeıdegi jarystarda asa tájirıbesi joq aralas quramyn jiberdi. О́ıtkeni álemdegi barlyq jarys pandemııaǵa baılanysty josparlanǵan ýaqytynan kesh uıymdastyrylyp jatqany belgili. Sol sebepti bıyl birinshi márte veloshabandozdar arasyndaǵy eń mártebeli eki jarys – «Ispanııa Výeltasy» men «Djıro d’Italııa» dodasy tarıhta alǵash ret bir ýaqytta derlik ótkizildi. Sóıtip Aleksandr Vınokýrov bastaǵan qazaqstandyq komanda eki jarysqa da aralas qurammen qatysýǵa májbúr boldy. Atap aıtar bolsaq, «Výeltada» Aleksandr Vlasov, Ion Isagırre, Gorka Isagırre, Lýıs Leon Sanches, Omar Fraıle, Aleks Aranbýrý, Dmıtrıı Grýzdev jáne Merhavı Kýdýs sekildi sportshylar baq synady. Al Italııadaǵy jarysta Iаkob Fýlsang, Mıgel Anhel Lopes, Iýrıı Natarov, Vadım Pronskıı, Manýele Boaro, Fabıo Fellıne jáne Oskar Rodrıges óner kórsetkenin taǵy bir ret aıta keteıik.
Sonymen bıylǵy «Ispanııa Výeltasynda» «Astana» velokomandasynan eń úzdik nátıjeni Aleksandr Vlasov tirkedi. 24 jastaǵy reseılik veloshabandoz 16-kezeńniń qorytyndysy boıynsha jalpy esepte toǵyzynshy orynda kele jatqan-dy. Alaıda 17-kezeńde márege 14-shi bolyp kelip, jalpy eseptegi jaǵdaıyn nasharlatyp aldy. Sóıtip bıylǵy dodany 11-orynmen túıindedi.
Joǵaryda aıtyp ótkenimizdeı, Ispanııa Grand-týrynda qazaqstandyq komandanyń velosportshysy toǵyz márte ár kezeńde úzdik ondyqtyń qatarynan kórindi. Jeke-jeke atap óter bolsaq, úshinshi jarys kúnin tamasha ótkizgen Aleksandr Vlasov La Lagýna Negra de Vınýesa shyńyna deıin bir shaqyrym qalǵanda shabýylǵa shyǵyp, nátıjesinde 5-orynǵa ıe boldy. Sondaı-aq reseılik veloshabandoz jarys sońyna deıin taǵy tórt márte úzdikter qatarynan kórindi. Máselen, 8-kezeńde márege tórtinshi bolyp jetse, 11-kezeńde altynshy boldy. Al 12-kezeńde márege synyq súıem qalǵanda súrindi. Koroldik taýly kezeńniń sońǵy shaqyrymynda kósh basyna shyqqan Vlasov jarys sońyna daıyn ústemdigin saqtaı almady. Nátıjesinde EF Pro Cycling ókili brıtanııalyq Hıý Kartı alǵa jiberip, ózi ekinshi oryn aldy. 16-kezeńde Aleksandr Vlasov máre syzyǵyn pelotonmen bir ýaqytta keskenimen, jarys sońynda 10-orynnan kórindi.
Sonymen qatar jarysty besinshi kezeńde márege qalyń toppen birge jetken ıspanııalyq Aleks Aranbýrý sprıntti jaqsy ótkizip, sol top arasynan 3-orynǵa, jalpy kezeńde 6-orynǵa qol jetkizdi. Sondaı-aq 10-kezeńdi tórtinshi orynmen túıindedi.
Altynshy kezeń «Astana» komandasy úshin óte sátti kún boldy. О́ıtkeni Ion Isagırre ataqty Aramon Formıgal shyńynda jeńiske jetse, Gorka Isagırre máre syzyǵyn toǵyzynshy bolyp kesti. Ion bul jarys kúninde márege 3 shaqyrym qalǵanda shabýylǵa shyqty. Aıtarlyqtaı basymdyqqa ıe bolǵan Isagırre shabýylyn sońyna deıin jetkizip, «Ispanııa Výeltasynda» alǵash ret jeńiske jetti. Sondaı-aq Isagırre velosport tarıhynda úsh Grand-týrda jeńiske jetken 100-shi velosportshy boldy. Buǵan deıin ol 2012 jyly Euskaltel-Euskadi komandasymen «Djıro d’Italııanyń», 2016 jyly Movistar Team ujymymen birge «Týr de Franstyń» birinshi kezeńinde top jarǵan. Sonymen qatar Ion Isagırre jarystyń eń sońǵy 17-shi taýly kezeńinde básekeni úzdik úshtiktiń qatarynda túıindedi.
Sonymen qatar jarystyń jetinshi kezeńinde de eki birdeı sportshymyz úzdik ondyqtyń qatarynan kórindi. Pýerto de Ordýnıa asýyn ekinshi márte júrip ótý barysynda Omar Fraıle Maıkl Výds, Alehandro Valverde, Nans Peters jáne Gııom Martandardyń shabýylyna ilesip, nátıjesinde bes shabandozdan turatyn kóshbasshy top arasyna qosyldy. Márege shamamen 3 shaqyrym qalǵanda «Astana» ókili shabýylǵa shyǵyp kórgen-di. Alaıda márege 1,3 shaqyrym qalǵanda Výds shabýyldap, kezeńde jeńiske jetse, Omar Fraıle 2-orynǵa ıek artty. Aleks Aranbýrý kóshbasshylardan keıingi toppen kómbege birge kelip, bul kezeńde 7-orynǵa ıe boldy.
«Astana» veloshabandozdary osylaısha jyldyń eń negizgi úsh dodasyn aıaqtady. Qyrkúıekte ótken «Týr de Fransta» Mıgel Anhel Lopes jalpy esepte altynshy oryndy ıelense, jýyrda ǵana aıaqtalǵan «Djıro d’Italııa» dodasyn Iаkob Fýlsang ta altynshy orynmen qorytyndylaǵan-dy.
Aıta keteıik, «Ispanııa Výeltasynda» 2006 jyly Aleksandr Vınokýrov bastap bergen jeńisti Alberto Kontador (2008) men Fabıo Arý (2015) sátti jalǵaǵan bolatyn. Sonymen qatar byltyrǵy dodada Mıgel Anhel Lopes pen Iаkob Fýlsang kezeń jeńimpazy atansa, «Astana» komandalyq esepte úzdikter qatarynan kóringenin aıta keteıik. Jarystyń sońǵy kúnindegi nátıjeni gazetimizdiń erteńgi nómirinen oqı alasyzdar.