Orta salmaqtaǵy IBF jáne IBO tujyrymy boıynsha álem chempıony, otandasymyz Gennadıı Golovkın polshalyq Kamıl Sheremetamen jeltoqsan aıynda judyryqtasatyn boldy. Bul týraly tanymal ınsaıder Maık Koppındjer málimdedi.
Onyń aıtýynsha, eki boksshynyń jekpe-jegi 18 nemese 19 jeltoqsanda AQSh-ta ótedi dep josparlanǵan. Al kezdesýdi DAZN tikeleı efırde kórsetpek. Sondaı-aq Koppındjer qazaqstandyq boksshy kelesi jyldyń kókteminde budan da mańyzdy jekpe-jek ótkizetinin aıtty.
«Gennadıı Golovkın 18 nemese 19 jeltoqsanda eki birdeı beldigin qorǵaıtyn bolady. Onyń bul jolǵy qarsylasy – Kamıl Sheremeta. Eger bul aıqasta Golovkın ataqtaryn sátti qorǵasa, 2021 jyldyń kókteminde tıtýldy jekpe-jek ótkizedi», dep jazdy Maık Koppındjer.
Aıta keteıik, Golovkın kásipqoı sharshy alańdaǵy eń keıingi jekpe-jegin 2019 jyldyń qazanynda ýkraınalyq Sergeı Derevıanchenkomen ótkizip, upaı sanymen basym túsken-di. Dál sol boks keshinde óner kórsetken Sheremeta meksıkalyq Oskar Kortesti nokaýtpen jeńgen bolatyn.