Nur-Sultan qalasynyń IX Azamattyq forýmy aıasynda memlekettik mekemeler qyzmetkerleri men jumysy jergilikti bıýdjetti qalyptastyrýmen jáne atqarýmen tikeleı baılanysty azamattyq belsendiler "Halyqtyq qatysý bıýdjeti" jobasynyń baǵyttaryn keńeıtýdi talqylady, dep habarlaıdy Egemen.kz elorda ákimdigine silteme jasap.
"Halyqtyq qatysý bıýdjeti» bıýdjet qarajatyn jumsaý boıynsha basymdyqtardy qalyptastyrýǵa jurtshylyqty tartýdyń perspektıvalyq tetigi bolyp tabylady. Bul mehanızm alǵash ret Saryarqa aýdanynda engizildi. Bıyl oǵan elordadaǵy basqa da aýdandar qosyldy. Biz barlyq qala turǵyndaryna osy tetiktiń múmkindikteri boıynsha aqparatqa teń qoljetimdilik qamtamasyz etilýi tıis dep esepteımiz", deıdi "Sosıým-zertteý" strategııalyq ortalyǵy" QB tóraıymy Altynaı Nurkeeva.
Onyń aıtýynsha, birinshi kezekte, barlyq aýdan ákimdikterine resmı saıttarda arnaıy bólimder qurý. Qazirgi ýaqytta 4 aýdannyń ishinde bul aıdar tek Saryarqa aýdanynyń ákimdiginde ǵana baryn jetkizdi.
"Bul mehanızmniń qalaı jumys isteıtini týraly aqparat túsinikti jáne qoljetimdi tilde kórsetilýi tıis. Kelesi kezeń halyqtyq qatysý jobasy boıynsha taqyryptar tizimin keńeıtý bolýy tıis, elorda turǵyndarynyń basqa taqyryptar boıynsha jáne qarjylandyrýdyń úlken kóleminde jobalar usynýǵa barlyq múmkindikteri bar", Altynaı Nurkeeva.
Sonymen birge dıalog alańyna qatysýshylar óz usynystaryn bildirip, jobaǵa qoldaý bildirdi.
Osylaısha, 9-12 qarasha aralyǵynda Nur-Sultan qalasynyń azamattyq bastamalar ortalyǵy bazasynda IX Azamattyq forým aıasynda ótkizilgen taqyryptyq sessııalardyń jumysy tolyq aıaqtaldy.
Jumys toptaryn ótkizý ÚEU men memlekettik organdar arasynda jınaqtalǵan TKSh, memlekettik tapsyrys, qoǵamdyq monıtorıng jáne t.b. salalardaǵy máseleler men usynystardy talqylaýǵa, sondaı-aq bılik pen azamattyq qoǵamnyń ózara is-qımylyn damytý úshin odan ári yntymaqtastyq baǵyttaryn aıqyndaýǵa múmkindik berdi.