Jahandy jaılaǵan koronavırýs indeti bul kúnde qaıtadan órship barady. Elimizde karantın talaptary saqtalǵanymen, ókinishke qaraı, qaýipti indetti juqtyrǵandardyń sany azaıatyn emes. Degenmen qazirgideı kúrdeli kezeńde memleket tarapynan tıisti qoldaýlar kórsetilip, adamdardyń qaýipsizdigine jiti kóńil bólinýde.
Sońǵy jaǵdaı boıynsha Jambyl oblysynda koronavırýs indetin juqtyrýdyń 5 jaǵdaıy tirkeldi. Búginde naýqastarda aýrý sımptomsyz túrde ótip jatyr eken. Jalpy, qaýipti indet Taraz qalasynyń Shý, Merki, T.Rysqulov aýdandarynyń turǵyndarynan anyqtalǵan. Indet juqtyrǵandar – ártúrli jastaǵy azamattar. Biraq olardyń barlyǵy da aýrýhanaǵa jatar aldynda tekseristen ótken. Jalpy alǵanda, búginde Jambyl oblysy boıynsha koronavırýs juqtyrýdyń 4 225 jaǵdaıy tirkelgen bolsa, aýrýhanalardan 4 114 naýqas emdelip shyqqan. Degenmen dál qazirgi ýaqyt asa saqtyqty qajet etetin bolyp tur.
Jýyrda ǵana óńirde koronavırýs indetimen kúres boıynsha oblystyq jedel shtabtyń kezekti otyrysy ótken bolatyn. Atalǵan jıynda Jambyl oblysy boıynsha sanıtarlyq-epıdemıologııalyq qadaǵalaý departamenti basshysynyń mindetin atqarýshy Neılıa Mýlıkova ótken aıda óńirde koronavırýs indetin juqtyrýdyń 60 jaǵdaıy tirkelgenin, ol aldyńǵy aımen salystyrǵanda aýrýshańdyq deńgeıiniń 1,4 esege óskenin habarlaǵan edi. Onyń aıtýynsha, jaǵdaılardyń kóbi Taraz qalasy, Shý, Baızaq jáne Qordaı aýdandarynda anyqtalǵan. Alaıda 31 ınfeksııa oshaqtarynda qorytyndy dezınfeksııalyq sharalar júrgizilip, baılanysta bolǵan 230 adam úı karantınine oqshaýlanǵan.
Qazirgideı kúrdeli kezeńde qaýipsizdik sharalaryn saqtaýdy áýeli árkim ózinen bastaǵany durys. Degenmen qoǵamdaǵy jaǵdaıdyń da rettelgeni mańyzdy. Osy oraıda bıylǵy 10 qazan men 6 qarasha aralyǵynda monıtorıngtik toptar 9 125 nysandy qamtyp, 1 328 reıdtik tekserister júrgizgen. Nátıjesinde, karantındik rejimniń 530 buzylý deregi anyqtalyp, 17 mln 852 myń 840 teńgege 163 hattama toltyrylǵan. Bul rette Neılıa Mýlıkova Baızaq, Shý, Talas, Sarysý aýdandary men Taraz qalasynyń mobıldi toptarynyń jumysyn jandandyrý qajet ekenin aıtty. Iаǵnı olardyń jumysy búginde álsiz. Sondyqtan da qazirgideı kúrdeli kezeńde muny jandandyrý mańyzdy.
Al oblystyq Densaýlyq saqtaý basqarmasynyń basshysy Áset Qalıevtiń aıtýynsha, búginde oblysta 345 myńnan asa adam vaksınalaýdan ótken. Halyqty qamtý kórsetkishi 30 paıyzdy quraǵan. Bir aıta keterligi, juqtyrý qaýpi joǵary toptaǵy adamdarǵa vaksına aqysyz egilýde. Bul tizimge medısına qyzmetkerleri, júkti áıelder, 14 jasqa deıingi balalar jáne zeınetkerler kiredi eken.
Alaıda qazirgi ýaqytta jaǵdaıdy túzelip ketti deýge bolmaıdy. Oblystyń bas sanıtar dárigeriniń qaýlysymen óńirde karantındik sharalardyń jeńildetilýi qabyldanǵanymen, barlyq shekteý sharasy alynyp tastalǵan joq. О́kinishke qaraı, talap tolyǵymen oryndalmaı otyr. Bir ǵana mysal, aýdandyq mobıldik top Qordaı aýdanynyń ortalyǵy Qordaı aýylynda úzdiksiz reıd júrgizýde. Nátıjesinde, Qordaı aýylyndaǵy «Kómbesh» tamaqtaný orny men «Qanat» azyq-túlik dúkeninde sanıtarlyq talaptardyń saqtalmaǵandyǵy anyqtalǵan. Sonymen qatar mobıldi top Qordaı aýylyndaǵy Á.Jumabekov kóshesi turǵynynyń betashar rásimin ótkizip jatqan keziniń ústinen túsken. Toı ıelerine ákimshilik quqyqbuzýshylyq týraly hattama toltyrylyp, qujattary tıisti mekemege joldanǵan. Osy sııaqty keleńsizdikter keleshekte ózge de aýdan, aýyldarda qaıtalanbaýy úshin, árkim karantın talaptaryn ózinen bastaǵany durys.
Jambyl oblysy