Fýtzaldan Eýro-2022 dodasynyń irikteý kezeńindegi Qazaqstan quramasynyń sońǵy qarsylasy anyqtaldy. Eki oıyn qorytyndysy boıynsha Kıprden basym túsken Izraıl oıynshylary Qazaqstanmen bir topta óner kórsetetin boldy.
Fýtzaldan Qazaqstan quramasy buǵan deıin Majarstan jáne Belarýspen birge 5-topta oınaıtyny belgili bolǵan edi. Aıta keteıik, 2020 jylǵy álem chempıonatyna irikteý kezeńinde sátti óner kórsetýiniń arqasynda Qazaqstan quramasy avtomatty túrde Eýro-2022 irikteýiniń úshinshi toptyq kezeńine joldama alǵan bolatyn. Eýro-2022 irikteý kezeńiniń toptyq oıyndary 6 jeltoqsanda bastalyp, 2021 jyldyń 14 sáýirinde aıaqtalady. Irikteý matchtary bıyl birinshi ret «úı – qonaq» júıesinde ótedi.
32 komanda 8 topqa bólinip, 15 joldama úshin baq synaıdy. Topta birinshi oryn alǵan segiz qurama jáne ekinshi oryndaǵy eń úzdik alty komanda Eýropa chempıonatyna tikeleı joldama alady. Sondaı-aq sońǵy joldamany topta ózgelerge qaraǵanda nashar oınap, biraq ekinshi oryn alǵan eki komanda ózara sarapqa salady. Eýropa chempıonaty 2022 jyldyń 19 qańtary men 6 aqpany aralyǵynda Nıderlandta ótedi.