Parlament Senaty Tóraǵasynyń orynbasary Asqar Shákirov EQYU Parlamenttik Assambleıasy Turaqty komıtetiniń otyrysyna qatysty, dep habarlady palatanyń baspasóz qyzmeti.
Beınekonferensııa baılanysy sıpatynda ótken otyrys barysynda koronavırýs pandemııasy jaǵdaıyndaǵy uıymnyń qazirgi qyzmeti týraly EQYU Parlamenttik Assambleıasynyń tóraǵasy Georgıı Seretelıdiń jáne Bas hatshy Roberto Montellanyń aqparaty tyńdaldy. Karantın sharalaryna qaramastan, EQYU saılaýdy (AQSh, Grýzııa, Chernogorııa jáne taǵy basqa elderdegi) baıqaýǵa qatysý jónindegi jumystardy belsendi túrde jalǵastyryp otyr. EQYU Parlamenttik Assambleıasynyń tóraǵasy, sondaı-aq 2021 jyly Qazaqstan men Qyrǵyzstanda bolatyn saılaýǵa monıtorıng júrgizý jónindegi alda turǵan jumystardy atap ótti.
BUU Dúnıejúzilik azyq-túlik baǵdarlamasynyń (WFP) atqarýshy dırektory, 2020 jyly Nobel syılyǵyn alǵan Devıd Bızlı negizgi baıandamashy retinde COVID-19 taralǵannan keıin halyqtyń tabysy tómen elderde azyq-túlik tapshylyǵy qıyndaı túsetini týraly aıtty.
«2020 jyl Ekinshi dúnıejúzilik soǵystan keıingi azyq-túlik qaýipsizdigi men gýmanıtarlyq daǵdarys turǵysynda eń aýyr jyl boldy. Koronavırýs pandemııasyna baılanysty ashtyqqa dýshar bolatyn adam sany 135 mıllıonnan 270 mıllıonǵa deıin ósti», dedi Devıd Bızlı.
WFP atqarýshy dırektory elderdi COVID-19 áseriniń basqa da máselelerine, atap aıtqanda densaýlyq saqtaý júıesi men azyq-túlik tapshylyǵy arasyndaǵy tepe-teńdikti saqtaý qajettigine nazar aýdarýǵa shaqyrdy.