Túrkistan oblysynyń polıseıleri týystarynyń atynan nesıe rásimdegen alaıaqty ustady, – dep habarlaıdy Polisia.kz.
Ordabasy APB-ne týys apaly-sińlili eki jergilikti turǵyn aryzdanady. Jábirlenýshi áıelderdiń aıtýynsha, beıtanys adam olardyń atynan onlaın-nesıe alǵan. Turǵynnyń atynan bes birdeı mıkrokredıttik uıymdardan 350 myń teńgedeı nesıe alǵanyn jetkizse, kelesisiniń atynan úsh bankten 100 myń teńgeden astam nesıe alynǵanyn kórsetken. Bir jylda bereshekteri kóbeıip, bankten habar kelgende turǵyndar tez arada tártip saqshylarynan mán-jaıdy anyqtaýǵa kómek berýlerin suraǵan.
Atalǵan jaıt SDTTBT-ne engizilip, QR QK-niń 190-baby (Alaıaqtyq) boıynsha tirkeldi. Aryzdanýshylardyń shaǵymyna sáıkes, oryn alǵan alaıaqtyq qylmysyn ashyp, kúdiktini anyqtaý maqsatynda Ordabasy aýdany polıseıleri qajetti is-sharalardy júrgizdi.
Tekserý jumystary nátıjesinde polıseıler osy qylmysqa qatysty kúdiktini anyqtap, ony turǵylyqty mekenjaıy Shymkent qalasynan ustady. Ol jábirlenýshilerdiń týys sińlisi bolyp shyqty. Tergeý barysynda anyqtalǵandaı, jábirlenýshi ótken jyly týys ápkelerine habarlasyp, qaryz tanystary aqsha tastaıtynyn, sol úshin banktik kartochkalarynyń kodtary men jeke kýálikteriniń málimetterin sýretke túsirip jiberýdi suraǵan. Sodan týysyna sengen jábirlenýshiler, ol suratqan aqparattardy beredi. Osy arqyly kúdikti onlaın-nesıe alýǵa ótinish tastap, nesıe rásimdegen.
Kúdikti óz kinásin tolyq moıyndap otyr. Kúdiktiniń bas sharasy qolhatpen bosatyldy. Qazirgi tańda sotqa deıingi tergeý amaldary júrgizilýde. Polıseıler oqıǵanyń tolyq mán-jaıyn anyqtaýda.