Aqtóbe, Almaty, Shyǵys Qazaqstan, Jambyl, Batys Qazaqstan, Qaraǵandy, Qostanaı, Qyzylorda, sondaı-aq Pavlodar oblystarynyń jáne Almaty men Shymkent qalalarynyń ákimdikteri qysqy kezeńde kommýnaldyq-turmystyq sektordyń úzdiksiz jumysyn qamtamasyz etý úshin kómir jetkizýdi aıaqtady.
2020-2021 jyldardaǵy kezeńde kommýnaldyq-turmystyq jáne halyqtyń qajettiligin qanaǵattandyrý úshin josparǵa sáıkes, tutyný kólemi shamamen 10 mln tonnany quraıdy. Onyń ishinde kommýnaldyq-turmystyq sektorǵa shamamen 2,8 mln tonna, sol sekildi halyqqa 7,2 mln tonna baǵyttalmaq. 17 qarashadaǵy jaǵdaı boıynsha kómir qorymen qamtamasyz etilý deńgeıi – 87%.
Byltyr jylytý maýsymynyń uqsas kezeńinde qatty otynmen qamtylý kórsetkishi kommýnaldyq-turmystyq sektorda 83,5%-dy, áleýmettik sektorda 81,1%-dy quraǵan edi.
Ákimdikterdiń aqparatyna súıensek, óńirlerdegi kómirdiń baǵasy halyqqa tonnasyna 6 myń teńgeden bastap, 19 myń teńgege deıin belgilengen.
Kenishtegi baǵa tonnasyna 2800 teńgeden 8200 teńgeniń aralyǵynda jáne kómir óndirý tehnologııasyna baılanysty. Eldiń energetıkalyq jáne ónerkásiptik kásiporyndaryna kómir tikeleı kelisimshart arqyly jáne shıkizat oshaqtaryndaǵy bosatý baǵasy boıynsha jiberiledi.
Elimizdiń energııa óndirýshi kásiporyndaryna 47,3 mln tonna kómir tıelse, ónerkásip kásiporyndaryna 4,7 mln tonna kómir jiberildi. Bul 2019 jyldyń sáıkes kezeńinen 2% - ǵa artyq. 23,7 mln tonna kómir eksporttaldy.