«Er jigittiń basyna ne kelip, ne ketpeıdi?!» Dál jańa jyldyń qarsańynda jol jıeginde turǵan Rýslan Qaırahovty kólik qaǵyp ketip, ómirin bir-aq sátte ózgertken. О́kinishtisi sol, 2013 jyldan beri tepse temir úzetin jigit arbaǵa tańylǵan.
Rýslandy qaǵyp ketken kólik súıegin syndyrǵanymen, erik-jigerin syndyrǵan joq. Bastysy – basy aman, baýyry bútin. Zaısan aýdanyndaǵy Úlken Qaratal aýylynyń turǵyny Rýslan Qaırahov búginde temirden túıin túıip, súıikti isin kásibine aınaldyrǵan. Sheberdiń qoly ortaq degendeı, oıýlap jasaǵan túrli-túrli buıymdaryna arysy Semeı, О́skemennen, berisi Zaısannan tapsyrystar túsip jatady. Ásirese gúl qoıatyn sórelerge, oıý-órnekti qaqpaǵa tapsyrys kóp. Sheber jigit taǵdyrdyń synaǵyna tap bolmas buryn, avtokólikterdiń shanaǵyn túzetýmen, boıaýmen aınalysqan. Sol úshin de ustalyq jumys oǵan jat emes.
– Memlekettiń «Eńbek» baǵdarlamasy arqyly 2 mln teńge grant utyp alyp, temir ıetin stanokqa qol jetkizdim. Jazdaı mektepterge gúl qoıatyn sóreler jasadym. Sóıtip kásibimdi dóńgeletip otyrǵan jaıym bar, – deıdi Rýslan.
Kásibinen nápaqasyn aıyryp otyrǵan ol basty baılyq densaýlyǵy ekenin uǵynǵan. Únemi belgili ýaqyttarda ońaltý ortalyqtarynda em alyp, densaýlyǵyn túzeýge tyrysady. Aptasyna eki ret Zaısan qalasyndaǵy «Dármen» ortalyǵyna baryp, túrli jattyǵýlaryn jasap, massajyn alady.
Erekshe qajettilikteri bar balalarǵa, múmkindigi shekteýli azamattarǵa arnaıy áleýmettik qyzmet kórsetetin «Dármen» kúndizgi beıimdeý ortalyǵy alǵash 2015 jyly ashylǵanda 15 adamǵa ǵana qyzmet kórsetetin. Al búginde 55-teı adam munda kelip em alady. Jyl óte qyzmet kórsetý aıasy da keńeıgen. Qazirgi ýaqytta ortalyqta psıhologııalyq, pedagogıkalyq, eńbek kabınetteri, massaj bólimderi, qolóner jáne vokal úıirmeleri jumys isteıdi.
– Erekshe qajettilikteri bar balalarǵa beıimdeý ortalyǵynyń áleýmettik pedagogteri, medbıkeler, massajıster qyzmet kórsetedi. Qyzmet túrleri áleýmettik qyzmet kórsetý standartymen shektelip qana qoımaı, múmkindigi shekteýli jandardyń jeke bas máselelerine de alańdaýshylyq bildirip otyrady. Olar árqashan kómek qoldaryn sozýǵa ázir, – deıdi «Dármen» ortalyǵynyń jetekshisi Jansaıa Mustabekova.
Sonymen qatar ortalyqqa kelgen múmkindigi shekteýli ár adamǵa quqyqtyq, psıhologııalyq keńester beriledi. Merekelik is-sharalarda aq dastarqan jaıylyp, konserttik baǵdarlamalar usynylady. Qamkóńil jandardyń kóńilderin kóterý úshin túrli oıyndar oınatylady. Shekteý sharalaryna baılanysty ondaı merekelik basqosýlar bıyl ǵana toqtap tur. Biraq bul qysyltaıań kezeńde de ortalyqtyń mamandary tynym tappaǵan. Múmkindigi shekteýli jandarǵa múgedektik sanatyn onlaın áperý, qujattaryn resimdeý syndy jumystardy júıeli uıymdastyryp, ýaqtyly jóndetip otyrýǵa kómektesken.
Ortalyqtyń Tarbaǵataı aýdanynda segiz bólimshesi jumys isteıdi. Olar áleýmettik tapsyrys aıasynda aýdandaǵy 80 jalǵyzbasty qart anaǵa arnaıy áleýmettik qyzmet kórsetedi. Odan bólek, jalǵyz turatyn qarııalarǵa da kómek kórsetiledi. Atap aıtsaq, áleýmettik qyzmetkerler Gúldana Orazǵalıeva, Asylǵaısha Yqybaeva, Gúldana Qabdyrahmanova 2016 jyldan bastap jalǵyz turatyn qarııalarǵa demeý bolyp, qamqorlyq kórsetip keledi. Olar qarttardyń úılerin jýyp-shaıyp, azyq-túlikterin ýaqtyly ákelip berip otyrady. Aýyryp qalǵan jaǵdaıda tolyqqandy em alýyn jaýapkershilikpen qadaǵalaıdy. Mereke-meıramdarda syılyqtaryn tapsyryp, turmys jaǵdaılaryna baılanysty azyq-túlikpen qamtamasyz etedi.
Taǵdyr talqysyna túsken jandarǵa qandaı kómek kórsetilse de azdyq etpeıdi. Olar úshin eń keregi – qoǵamda kembaǵal kúı keshpeı, múmkindikterine qaraı eńbekke, oqý men bilimge aralasý. Sondyqtan da «Dármen» syndy beıimdeý ortalyqtarynda bilikti mamandar qyzmet etip, qoldan kelgen kómekterinen aıanyp qalyp otyrǵan joq. Ortalyq mamandarynyń pikirinshe, múmkindigi shekteýli ár jan Rýslandaı jigerin qaırap, oqysa, bilim alsa, eńbek etse, eshkim eshkimnen kem ómir súrmeıdi.
Shyǵys Qazaqstan oblysy,
Zaısan aýdany