Túrli sebep-saldarǵa baılanysty ásker qataryna qabyldanbaǵan nemese bara almaı júrgenderge memleket múmkindik jasap otyr. Máselen, erte shańyraq kótergen nemese otbasynyń asyraýshysy retinde uzaq ýaqytqa kete almaıtyn azamattar áskerı sala tóńireginde bilim alyp, yqshamdalǵan áskerı daıarlyqtan óte alady. Ol úshin Qazaqstanda arnaıy áskerı-tehnıkalyq mektepter jumys isteıdi. Oqý merzimi 40-42 kún, ıa bolmasa 280 saǵattan turady.
Mysaly, Qazaqstan Respýblıkasy Qorǵanys mınıstrliginiń Petropavl qalasynda ornalasqan áskerı-tehnıkalyq mektebi Soltústik Qazaqstan oblysynan bólek Qostanaı oblysyna da áskerı mamandar daıarlaıdy.
Dál qazirgi sátte qos oblystan jınalǵan 39 jigit atalǵan mektepte áskerı-bilim alyp jatyr. Olar kele salysymen jaýyngerlik jarǵymen tanysyp, áskerı jattyǵýlardy oryndaýdy úırendi. Qysqa ýaqyt aralyǵynda túrli áskerı qarý-jaraqtardy qoldanýdyń ádis-tásilderin meńgerdi. Olardyń ishinde kóp qoldanylatyn AK-74, RPG-18 jáne taǵy da basqa qarýlardy aıtýǵa bolady. Áskerge shaqyrylýshylar kúndelikti daıarlyqtyń arqasynda arnaıy polıgonǵa baryp AK-74 avtomatynan oq atyp ta kórdi. Qoldaryna alǵash ret avtomat alǵan 7-shi jáne 8-shi vzvod jaýyngerleriniń arasynda mergendigimen kózge túskender de bar. Sonymen qatar sarbazdar bıologııalyq qarýdan qorǵaıtyn kıim men jabdyqtardy asyný, birneshe pozısııada okop qazý sekildi ózge de jattyǵýlar boıynsha normatıv tapsyryp jatyr.
Bul mektep 1927 jyly Qorǵanysqa, avıasııalyq jáne hımııalyq qurylysqa járdemdesý qoǵamy (Osoavıahım) bolyp qurylǵan. Ár kezeńde ártúrli mamandar daıarlaýyna baılanysty mekteptiń ataýynda birshama ózgerister boldy. Al Qazaqstan Úkimetiniń 2013 jylǵy 11 aqpandaǵy №118 qaýlysymen áskerı-tehnıkalyq mektepti damytýdyń jańa paraǵy ashyldy dese de bolady. Osy qujatty basshylyqqa ala otyryp «QR QM ÁTM»( Qazaqstan Respýblıkasy Qorǵanys mınıstrliginiń Áskerı-tehnıkalyq mektebi) RM QK Petropavl fılıaly janynan áskerı oqytylǵan rezervtiń jeke quramyn daıarlaý úshin jaǵdaılar jasala bastady.
Sol ýaqyttan beri 2600-den astam adam bastapqy áskerı daıarlyq baǵdarlamasy boıynsha oqytýdan ótti jáne «atqysh» áskerı biliktiligin ıelendi. Eger ótken jyly fılıal áskerı daıarlyqtan ótken 261 adamdy rezervke shyǵarsa, bıyl 360 maman daıarlaý josparlanǵan. Qazirgi áskerı daıarlyq barysynda atqyshtardy, pýlemetshilerdi, mergenderdi, granata atqyshtardy jáne basqa da mamandardy daıarlaýǵa baǵyttalǵan. Aldaǵy ýaqytta oqý-materıaldyq bazasyna baılanysty pýlemetshilerdi oqytý kózdelgen. Atalmysh áskerı-mekteptiń dırektory Qalıolla Saýytbekov qysqa ýaqyttyń ishinde barynsha qajetti dúnıelerdi kýrsanttarǵa úıretý – birinshi mindetimiz degendi aıtady.
– 40 kún ishinde áskerı bılet alý jastar úshin ońtaıly bolsa, elimizdiń Qarýly Kúshteri qatary úshin de tıimdi. Olar rezervpen tolyǵady, deıdi Qalıolla Saýytbekov.
Mundaǵy sarbazdar qataryna túrli jaǵdaıǵa baılanysty áskerı qyzmetke shaqyrylmaǵan 24-ten 35 jasqa deıingi azamattar alynady. Árıne, 27 jasqa tolǵan soń áskerı bılet beriledi. Degenmen, ondaǵy «áskerı daıarlyqtan ótken joq, áskerı ant qabyldamaǵan» degen sózder jastardyń mańyzdy qyzmetterge ornalasýyna tusaý bolady. Sondyqtan da áskerı-mektep 35 jasqa deıingi azamattardy da oqytady. Mundaı mektepterde bilim alý 263 318 teńge turady. Bul aqsha sarbazdardy jazǵy jáne qysqy áskerı kıimdermen jáne azyq-túlikpen qamtýǵa arnalǵan. Budan bólek jeksenbi kúnderi monshaǵa aparý sekildi qajetti sharalar úshin jumsalady.
Oqý korpýsynda sarbazdardyń bilim alýy úshin talapqa saı jaǵdaı jasalǵan. Korpýs qaramaǵynda kazarma, ashana, oqý bólmeleri, jabdyqtar, jattyǵý alańy, avtodrom, sportzal, murajaı bar. Sabaqtardy tájirıbeli ustazdar – zapastaǵy ofıserler Iýrıı Glýmov, Igor Chetverov, Vıktor Sırotkın, Aleksandr Stepanov, Jaılaý Sharıpov (Aýǵan soǵysynyń ardageri), Sadyrbek Týıbaev, Janat Sarsembaev júrgizedi.
Jaýyngerler arnaıy bekitilgen taktıkalyq, órt sóndirý, ınjenerlik, áskerı-medısınalyq daıyndyq, baılanys jáne áskerı topografııa jáne taǵy da basqa mańyzdy pánder boıynsha bilim alady. Sáıkesinshe, synaq emtıhandaryna qatysady. Sondaı-aq dene shynyqtyrý jattyǵýlary da mańyzǵa ıe.
Basty maqsat – el basyna qaýip tóne qalǵanda qorǵan bolar áskerı bilimi men qarym-qabileti, patrıottyq sezimi bar azamattar qataryn kóbeıtý. Bul rette áskerı-tehnıkalyq mektepterdiń berer paıdasy orasan. Qazir mundaı mektepter elimizdiń 15 qalasynda bar.