Alyp báıterekteı tereń tamyry qurlyqtarǵa jaıylǵan túrki álemin ǵasyrlar toǵysynda túrlendirip túletken, osylaısha baýyrlastyqqa jańasha baı mazmun bergen, túrki ıntegrasııasynyń arhıtektory, Elbasy Nursultan Nazarbaev ekeni jalpaq jahanǵa belgili.
Kóp túriktiń atajurtynda jańa memlekettiń irgesin qalaǵan Qazaqstannyń Tuńǵysh Prezıdenti túrki áleminiń yntymaqtastyǵyna áý bastan aıryqsha mán berip, týys jurtty túgendep, úzilip qalǵan altyn arqaýdy qaıta jalǵady. Áýeli irgedegi aǵaıyn eldermen dostyq baılanystardy arttyrýǵa basa nazar aýdaryp, Ortalyq Azııa yntymaqtastyǵyn qurý jóninde bastama kóterdi. Eýrazııanyń kúretamyry bolǵan Uly Jibek jolyn qaıta jandandyryp, Altaı men Anadolynyń arasyn jalǵaǵan túbi bir týys elderdiń asyl muratyna jol ashty. Sonaý toqsanynshy jyldardan beri Túrkitildes memleketterdiń alqaly basqosýlaryna uıytqy bolyp, Túrki Keńesi, TúrkPA, TÚRKSOI, Túrki Aqsaqaldar keńesi, Halyqaralyq Túrki akademııasy syndy irgeli uıymdardyń negizin qalap, mańyzdy ıdeıalarǵa bastamashy boldy. Túgel túrkiniń túpqazyǵy, áziret qonǵan áz qala, kıeli Túrkistandy túletti. Sondyqtan 2010 jyly Túrkistanda Túrkııa Prezıdenti Elbasynyń ıyǵyna aq shapan jaýyp, qolyna asa taıaq ustatyp, ony «Túrki áleminiń lıderi» dep baǵalady. Al byltyr Bakýde ótken Túrki keńesiniń Sammıtinde baýyrlas elderdiń basshylary biraýyzdan Elbasyn «Túrki keńesiniń qurmetti tóraǵasy» saılap, uıymnyń mártebeli ordenimen marapattaýy Nursultan Nazarbaevtyń túrki álemine sińirgen eńbeginiń jemisi ekeni anyq.
Elbasy túrli halyqaralyq uıymdardyń qurylýyna bastamashy bolýmen qatar túrki álemin biriktirýde jáne halyqaralyq bitimgerlik saıasatta da eńbegi ushan-teńiz. Búginde túrki jurtynyń kez kelgen kúrmeýi qıyn shıryqqan shıelenisti sheshimderde Elbasynyń mámilegerligi men bitimgerligine arqa súıeıtini jasyryn emes. Kúni keshe soǵys órti basylǵan Qarabaq máselesinde de Elbasy áýelden bitimgerlik ádil baǵytty usynyp, túıtkildi jaıtty BUU zań-qararyna talaptaryna saı beıbit jolmen sheshýge shaqyrǵan edi. Túrkııa men Reseıdiń qyrǵıqabaq salqyndyǵyna araaǵaıyndyq etken eńbegin de jurtshylyq túgel moıyndaıdy.
Elbasynyń tamyrly tarıhymyzdy túgendeýge erekshe ekpin berýi arqyly óshkenimiz janyp, ótkenimiz sanamyzda sáýlelendi. Halqymyzdyń tarıhı jadysyna qan júgirip, el shejiresiniń ekinshi tynysy ashyldy. «Mádenı mura» arqyly sheteldik arhıvterden qazaq eliniń tarıhy týraly qyrýar derekter jınaqtalyp, irgeli zertteýler rýhanııatymyzǵa jaýhar kómbe bolyp qosyldy. Elbasynyń «Tarıh tolqynynda», «Mádenı mura» «Rýhanı jańǵyrý», «Uly dalanyń jeti qyry» sekildi keshendi baǵdarlamalary júzege asyrylyp, shyn máninde rýhanı jańǵyrýǵa berik negiz qalandy, zor tájirıbe, baı qor jınaqtaldy. Shyntýaıtynda bul bastamalar tek qazaq halqynyń ǵana emes, tamyry bir, tarıhy ortaq túrki jurtynyń ulttyq jadysyn oıatyp, jańa ǵasyrdaǵy túrki áleminiń oıanýyna alyp keldi. Baıqal men Balqannyń, Altaı men Anadolynyń, Mońǵolııa men Majarstannyń arasyndaǵy Uly dalada baıyrǵy babalardyń ónegeli izi men ómirsheń sózi bútin bitimimen júıeli qazynaǵa aınaldy. Arǵymaqty alǵash aýyzdyqtap, bolat balqytyp, temirden túıin túıgen, jylqynyń jalynda týǵan jaýynger jurttyń jurnaǵy ekenimiz jer júzine Elbasynyń «Bolashaqqa baǵdar: rýhanı jańǵyrý», «Uly dalanyń jeti qyry» atty mańyzdy baǵdarlamalyq maqalalarymen dáıekteldi. Osylaısha qalǵyp ketken tarıhı sanany oıatý, ulttyq kodtarymyzdy anyqtaý hám halqymyzdy jarqyn bolashaqqa yntalandyrý baǵdarlamalary tutas túrki dúnıesi úshin mańyzdy bastamaǵa balandy.
Tuǵyrly tulǵa ǵumyrly tarıhty jasasa, kerisinshe, tarıh ta tegeýrindi tulǵany týdyrady. Zamana kóshi órkenıetke bet burǵan saıyn kemeńger tulǵalardyń kerýen joly alasarmaı, ýaqyt ótken saıyn asqaqtaı bereri aqıqat. Sebebi adamzat tarıhynda artyna óshpes mura qaldyryp, órkenıet kókjıegin keńeıtýge zor úles qosqan tuǵyrly tulǵalarymyz búgin men keleshek urpaq úshin rýhanı azyq, jol bastar temirqazyq bolary aıqyn. Biz búgin barymyzdy qasterlep, birlikti baıraq etip, Alash arystaryna ańsar-arman bolǵan baýyrlastyǵymyzdy bekemdeı tússek, ol – Elbasynyń eren eńbegi, bolat jigeri, asyl muratynyń júzege asqanynyń shynaıy da aıqyn kórinisi. Sondyqtan tarıhy ortaq, tamyry bir, taǵdyry uqsas, týyrlyǵy tutas, týystyǵy óristi, yntymaǵy yrysty túgel túrkiniń tuǵyrly tulǵasy, álbette, Elbasy Nursultan Nazarbaev ekeni anyq.