Shymbulaq taý-shańǵy kesheni Almaty qalasynyń týrısteri men qala turǵyndarynyń súıikti orny. Halyq arasynda júrgizilip jatqan aqparattyq-profılaktıkalyq jumystarǵa qaramastan, kóptegen azamat taýdaǵy júris-turys qaýipsizdigi erejelerin saqtamaıdy, dep habarlaıdy Egemen.kz
Osylaısha, 2020 jyldyń 9 jeltoqsanynda túngi saǵat 00:30-da QR TJM Respýblıkalyq jedel-qutqarý jasaǵynyń kezekshi bólimine Shymbulaq TShK Medeý aýdanynda 3000 astam metr bıiktikte, Chımbýlachka ózeniniń boıynda 1955 jyly týǵan er adam adasyp ketti degen habarlama kelip tústi. Er adam "Malaıa krýgosvetka" baǵyty boıynsha júrgen. Alaıda, jaýǵan qardyń bıiktigi 1 metr jáne tasty joldan ótý qıyn bolǵandyqtan, ol joldan shyǵyp ketken. Jolda ózdiginen júre almaı, tońyp, álsirep qalǵan. Osy sátte adasqan er adamǵa qutqarýshylardyń kómegi qajet bolǵan.
Oqıǵa ornyna shuǵyl túrde 6 qutqarýshy, onyń ishinde kınologııalyq esebi bar Respýblıkalyq jedel-qutqarý jasaǵynyń jedel toby jolǵa shyqty. Qutqarý jumysyna 1 birlik arnaıy tehnıka jumyldyryldy.
RJQJ jedel toby izdeý jumystaryn bastady. Qutqarýshy top qar basqan, shalǵaı oıly-qyrly jerlerden ótip, qońyraý shalǵan sátten bastap bir saǵat ishinde qatty gıpotermııa belgileri bar zardap shekken adamdy tapty. Oǵan alǵashqy medısınalyq jáne psıhologııalyq kómek kórsetti.
Qatty tońyp qalǵan er adamǵa qutqarýshylar ystyq shaı, jyly kıim berdi. Zardap shegýshige shuǵyl kómek kórsetip, ony qaýipsiz jerge jetkizdi. Qutqarýshylardyń jedel jumysynyń arqasynda er adamnyń jaǵdaıy qanaǵattanarlyq jaǵdaıda.