Bul týraly Prezıdenttiń baspasóz hatshysy Berik Ýálı óziniń Facebook paraqshasynda málim etti.
"Italııa jáne Chılı elderimen birlese otyryp, Birikken Ulttar Uıymy, Ulybrıtanııa jáne Fransııa uıymdastyrǵan bul is-shara vıdeo konferensııa formatynda ótedi. Vırtýaldy sammıtke Qasym-Jomart Toqaevtan bólek 75 memlekettiń Prezıdentteri men Úkimet basshylary, halyqaralyq uıymdardyń, bıznes qurylymdarynyń jetekshileri, qoǵamdyq jáne akademııalyq toptardyń ókilderi qatysady", deıdi Berik Ýálı.
Sondaı-aq baspasóz hatshysy jıynǵa qatysýshy elder Parıj kelisiminiń negizgi úsh komponenti aıasynda jańa ári asa mańyzdy mindetterdi jarııalaıtynyn aıtty.
Atap aıtqanda koronavırýs indetinen keıingi kezeńde ekologııalyq jáne turaqty qalypqa kelý máselelerin qamtamasyz etýge baǵyttalǵan klımattyń ózgerýi saldaryn jeńildetý, olarǵa beıimdelý jáne qarjylandyrý.
"Memleket basshysy óziniń beıne úndeýinde klımattyń ózgerýine qarsy kúreste elimizdiń qoldanyp jatqan negizgi ádisteri jóninde aıtyp, Parıj kelisiminde bekitilgen maqsattar men mindetterge beıildigin naqtylaıdy dep josparlanýda", deıdi Berik Ýálı.
Is-sharanyń tikeleı translıasııasyn myna silteme arqyly kórýge bolady: https://www.climateambitionsummit2020.org/index.php