Qyzylorda qalasynyń ákimi Nurlybek Nálibaev Tuńǵysh prezıdent qorynyń uıymdastyrýymen ótken «Myń bala» ulttyq zııatkerlik olımpıadasynyń jeńimpazdaryn qabyldap, ozat oqýshylardy jeńisimen quttyqtady, dep habarlaıdy Egemen.kz.
Sharada shahar basshysy jastardyń sapaly bilim alýy, ǵylymmen aınalysýy búgingi kúnniń basty talaby ekenine toqtalyp, zııatker shákirtterdiń bilimin shyńdap, el úshin qyzmet etetindigine zor senim bildiretindigin jetkizdi.
Ulttyq olımpıadada úzdik shyqqan oqýshynyń biri – Aqnıet Qýanysh. Aqnıet buǵan deıin Qyzylózek aýyldyq okrýgindegi №39 orta mektepte bilim alǵan. Bilim báıgesindegi jeńisi arqyly bıyldan bastap qaladaǵy daryndy balalarǵa arnalǵan №4 Daryn mektebinde bilimin shyńdaýǵa múmkindik aldy. Jıynda óz qýanyshyn bólisken olımpıada jeńimpazy mundaı jetistikke jetýine sebepker bolǵan óz ustazdaryna alǵysyn bildirdi.
Aıta keteıik, respýblıkalyq «Myń bala» ulttyq zııatkerlik olımpıadasyna elimizdegi 5-6 synyp oqıtyn barlyq oqýshy qatysyp, baq synady. Atalǵan bilim báıgesinde Qyzylorda qalasyna qarasty aýyldyq eldi-mekenderde ornalasqan 13 mekteptiń bilim alýshylary da synǵa tústi. Oqýshylar olımpıadasynyń aqtyq kezeńine qyzylordalyq 31 oqýshy joldama alyp, onyń ishinde jeteýi jeńimpaz atandy. Jeńimpazdar qaladaǵy Bilim ınovasııa lıseıi, N.Nazarbaev zııatkerlik mektebi, daryndy balalarǵa arnalǵan №4 Daryn mektebine konkýrssyz joldama aldy. Qazir eki oqýshy óz bilimderin atalǵan bilim uıalarynda shyńdap jatsa, qalǵan bes oqýshy mundaı múmkindikke 6 synypty aıaqtaǵan soń ıe bolmaq.
Jıyn sońynda shahar basshysy jylda qalada jańa bilim oshaqtary paıdalanýǵa berilip, mektepterdiń materıaldyq-tehnıkalyq bazasyn nyǵaıtýda úlken jumystar júzege asyrylyp jatqanyn, munyń barlyǵy jas urpaqtyń sanaly tárbıe men sapaly bilim alýyna baǵyttalǵan keleli ister ekenin atap ótip, bilim dodasynda daralanyp, jeńimpaz atanǵan 7 oqýshyǵa noýtbýk berip, dıplomdar tabystady.