«Samuryq-Qazyna» UÁQ» AQ Dırektorlar keńesi qordyń 2021-2025 jyldarǵa arnalǵan damý josparyn bekitti. Bul týraly brıfıng barysynda «Samuryq-Qazyna» UÁQ» AQ Strategııalyq damý jónindegi basqarýshy dırektory Lázzat Boranqulova habarlady.
13-qarashada Qazaqstannyń Tuńǵysh Prezıdenti – Elbasy tóraǵalyq etken keńeste qordyń basqarma tóraǵasy Ahmetjan Esimov ulttyq kompanııany ınvestısııalyq holdıngke aınaldyrý tujyrymdamasyn usyndy. Onyń aıasynda 2028 jylǵa deıingi jańartylǵan damý strategııasynda qordyń negizgi maqsattary aıqyndaldy. Atap aıtqanda, orta merzimdi keleshekte «Samuryq-Qazyna» jetekshi derbes ál-aýqat qorlary sekildi ınvestholdıng retinde jańa jumys formatyna aýysýdy kózdep otyr.
Lázzat Boranqulovanyń aıtýynsha, qordyń aldaǵy bes jylǵa arnalǵan damý josparynyń negizgi mindetteri qarjylyq turaqtylyqty qamtamasyz etý, korporatıvtik ortalyq pen qordyń portfeldik kompanııalary ótimdiliginiń jetkilikti deńgeıin qoldaý. Spıker 2021 jyly ál-aýqat qory ınvestısııalyq holdıngke aýysý baǵytynda belsendi kirisetinin jetkizdi. Jańa portfeldiń ulǵaıýyn qamtamasyz etý maqsatynda Bolashaq urpaq qoryn qalyptastyrýǵa baılanysty jumys jalǵasyp, sondaı-aq birlesken ınvestısııalaý qaǵıdattary negizinde tikeleı ınvestısııalardy júzege asyrýǵa kirispek.
Onyń aıtýynsha, bul qor portfelindegi kommersııalyq aktıvterdi qalyptastyrýǵa múmkindik beredi. Osylaısha, 2024 jylǵa qaraı ınvestısııalyq portfel belsendi basqarýǵa tolyq kóshirilip, ony ońtaılandyrýǵa jáne qaıta qurylymdaýdy jalǵastyrýǵa jol ashylady.
Kompanııa ókiliniń sózine súıensek, keler jyldan bastap qor ınvestısııalaýdy belsendi túrde júrgizedi. Qazir 12 basym sala anyqtalyp, onyń ishinde aqparattyq tehnologııalar, ınfraqurylymdyq qurylys, jasyl energetıka, hımııa ónerkásibi, densaýlyq saqtaý, mashına jasaý, logıstıka, aýyl sharýashylyǵy jáne taý-ken ónerkásibi sekildi baǵyttar qamtylǵanyn aıta ketken oryndy. Bul tizim álemdik jáne aımaqtyq úrdister men naryqtyń ózgerýine baılanysty jyl saıyn jańartylyp otyrady.
L.Boranqulovanyń aıtýynsha, álemdik daǵdarys Qor tobynyń qarjylyq kórsetkishterine áser etti. Biraq ta «Samuryq-Qazyna» osy jyldy bastapqy josparlardan áldeqaıda joǵary ári naqty kórsetkishtermen aıaqtaıdy dep boljanýda.
«Qalyptasqan syrtqy faktorlarǵa qaramastan, 2021 jyly kompanııalar tobynyń negizgi strategııalyq kórsetkishteri bıylǵy baǵamen salystyrǵanda jaqsarýda. Qordyń taza aktıvteriniń quny 2021 jyly 653 mlrd teńgege ósip, 14 trln teńgege jetedi. Sońǵy 6 jylda ortasha jyldyq ósý qarqyny 8,2%-ǵa, sońǵy 10 jylda 9,1%-ǵa teń. Boljanǵan ósim maqsatty túrde aıqyndalǵan 8% deńgeıinen asyp túsedi», dedi L.Boranqulova.
2025 jylǵa qaraı qordyń taza aktıvteriniń quny 6,9 trln teńgege artyp, 21 trln teńgeni quraıdy dep boljanyp otyr. Kelesi jyly kompanııanyń taza kirisi 523 mlrd teńgege jetip, bul bıylǵy kórsetkishten 22%-ǵa joǵary bolatynyn aıta ketken jón. Aldaǵy 4 jylda taza kiristiń jalpy kólemi 6,2 trln teńgege jetpek. Kapıtal tıimdiliginiń kórsetkishi 4,7% deńgeıinde josparlanyp, 2025 jylǵa qaraı 9,1%-ǵa deıin jaqsarady dep boljanyp otyr.
Osylaısha, Dırektorlar keńesi bekitken damý jospary qordyń 2028 jylǵa deıingi damý strategııasyna tolyq sáıkes kelip, ony iske asyrýdy qoldaıdy. Buǵan qosa «Samuryq-Qazyna» bıyl bastalǵan shyǵystar men kúrdeli salymdar deńgeıin baqylaý jónindegi júıeli jumysty 2021 jyly da jalǵastyrady.