El Prezıdenti Qasym-Jomart Toqaev qazaqstandyqtardy memlekettigimizdiń altyn dińgegi – Táýelsizdik kúnimen quttyqtaı otyryp, halqymyzdyń aldaǵy mindetterine toqtalyp ótti.
Barshamyzǵa belgili, kelesi jyl qazaq halqy úshin – taǵylymdy kezeń. Qazaqstan Respýblıkasy Táýelsizdiktiń 30 jyldyǵyna qadam basyp, mejeli datany atap ótedi. El Prezıdenti óz sózinde aıtyp ótkendeı, pandemııa saldarynan elimizdiń eń ulyq merekesin keń aýqymda atap óte almadyq. Alaıda Táýelsizdik meıramynyń rýhy ár azamattyń júreginde laýlap tur, al qundylyǵy – talaıǵa baǵa jetpes mura. Rasynda da, biz betpe-bet kelgen qıyndyqqa moıymaı, tek alǵa berik senimmen qadam basamyz. Osy otyz jylda qalyptasqan eldigimiz bizdi adastyrmaıdy. Táýelsizdik – bizdiń basty baǵdarymyz ben temirqazyǵymyz.
Bizge úlken konferensııalar, sımpozıýmdardan góri, «Halyq únine qulaq asatyn memleket» tujyrymdamasynyń naqty dáleli bola alatyn áleýmettik-ekonomıkalyq is-sharalar mańyzdy. Bul týraly el Prezıdenti de naqty aıtyp ótti. «Biz halqymyz úshin asa qasterli merekeni naqty istermen jáne jańa jobalarmen atap ótemiz», dedi Q.Toqaev. El bıliginiń iri naýqandar men pafosqa qurylǵan is-sharalar formatynan bas tartatyny, barlyq jumys barynsha pragmatıkalyq túrde, únemdi bolatyny qýantady. Basymdyq ekonomıka, áleýmettik sala men ekologııaǵa berilip, júıeli sharalardyń kólemdi keshenin iske asyrý jalǵasyn tappaq. Halyqtyń barlyq toptarynyń, ásirese jastardyń, áıelderdiń, múmkindigi shekteýli azamattarymyzdyń muqtajdyǵy men qajettilikterine jiti nazar aýdarylatyny shynynda áleýmettik máselelerdiń kún tártibinde ekenin kórsetedi. Halyqtyń jaǵdaıyn túzetý, demokratııalyq ınstıtýttardy odan ári jetildirý, az qamtylǵan otbasylardy, kóp balaly analardy, jastarǵa degen qamqorlyqqa baǵyttalǵan is-sharalardy ótkizý kelesi jyldyń basty mindetteri dep belgilendi.
Táýelsizdiktiń 30 jyldyǵynda memlekettigimiz bekip, eldigimiz nyǵaıa tústi. Táýelsizdik – biz úshin meıram ǵana emes, ıdeologııamyzdy, kúsh-jigerimizdi baǵyttaı otyryp, tyńǵylyqty dúnıe atqaratyn úlken máni bar astarly uǵym. Táýelsizdigimiz nyǵaıǵan saıyn, keıbir sheteldik saıasatkerlerdiń orynsyz pikirlerine urynyp jatamyz. Mundaı qate, tolyq zerttelmegen málimdemeler Qazaqstannyń egemendigin el basyndaǵy tulǵalar ǵana emes, barlyq halyq bolyp qyzǵyshtaı qorǵap, qasterleýimiz kerek ekenin kórsetedi. Ár azamat úshin táýelsizdik kıeli uǵym bolyp qalyptasýy kerek. Osy rette Prezıdenttiń turǵyndardyń yntymaǵyn, halyqtyń birligin, eldiń egemendigin kóteremiz degen oılary kóńilge qonady. Al barsha qazaqstandyq osy ıdeıany júzege asyrýǵa jumyla kiriskenimiz durys.
Nurlan DÝLATBEKOV,
E.Bóketov atyndaǵy ýnıversıtet rektory, UǴA korrespondent-múshesi, professor