Densaýlyq saqtaý mınıstri Alekseı Soı issaparmen Shyǵys Qazaqstan oblysyna bardy, dep habarlaıdy Egemen.kz.
Densaýlyq saqtaý mınıstri óńirdegi epıdemıologııalyq jaǵdaımen tanysty, sondaı-aq 2020 jylǵy 1 qyrkúıekte Prezıdent Qasym-Jomart Toqaevtyń Qazaqstan halqyna Joldaýynyń negizgi baǵyttaryn jáne QR Úkimetiniń densaýlyq saqtaý júıesiniń aldyna qoıǵan mindetterin túsindirý úshin birqatar kezdesý ótkizdi.
Mınıstr Shyǵys Qazaqstan oblystyq aýrýhanasynyń konsýltatıvtik-dıagnostıkalyq ortalyǵynda boldy, sondaı-aq óńirdegi aktıvtermen kezdesý ótkizdi, medısına qyzmetkerlerin qoldaý maqsatynda qabyldanyp jatqan sharalar týraly - koronavırýs ınfeksııasyna qarsy kúreske tartylǵan mamandarǵa arnalǵan ústemaqy jaıly aıtty.
A.Soı dárigerler men sanıtarlyq-epıdemıologııalyq qyzmet qyzmetkerleriniń jalaqysyn kezeń-kezeńimen arttyrý jónindegi mindetti iske asyrý úshin 2021-2023 jyldarǵa arnalǵan respýblıkalyq bıýdjet jobasynda shamamen 1,1 trln teńge qarastyrylǵanyn eske saldy.
Qazaqstanda Prezıdent Qasym-Jomart Toqaevtyń tapsyrmasy boıynsha alǵashqy medısınalyq kómekti uıymdastyrý tásilderin túbegeıli qaıta qaraý boıynsha jumystar júrgizilýde. Mınıstrlik Qazaqstan halqynyń qajettilikterine jáne sheteldik praktıkanyń ozyq jetistikterine jaýap beretin MSAK-ty damytýdyń uzaq merzimdi strategııasyn qalyptastyrý boıynsha jumys isteýde.
Ol úshin ambýlatorııalyq-emhanalyq kómektiń qoljetimdiligin jaqsartý boıynsha 2021-2023 jyldarǵa arnalǵan sharalar kesheniniń jobasy qalyptastyrylýda, ol eldiń búkil halqyn profılaktıkalyq tekserýmen qamtýdy jáne «Aýyl – El besigi» arnaıy jobasyn eskere otyryp, densaýlyq saqtaý ınfraqurylymyn damytýdyń óńirlik perspektıvalyq josparlaryna sáıkes keminde 300 MSAK obektisin ashýdy, MSAK jumysyn halyqtyń medısınalyq qyzmetter kórsetý jónindegi qajettilikterine baǵdarlaýdy qamtıdy.
«Medısınalyq kómektiń qol jetimdiligin jaqsartý úshin barynsha kóliktegi medısınany damytý qajet. Qajetti jabdyqtarmen, О́JJ apparatymen tolyq jabdyqtalǵan 100 jyljymaly medısınalyq keshen satyp alyp, óńirlerge tarattyq. Munyń barlyǵy elimizdiń túkpir-túkpirindegi halyqqa sapaly kómek kórsetýge múmkindik beredi», - dedi A.Soı.
Sonymen qatar, Prezıdenttiń tapsyrmasyn oryndaý aıasynda densaýlyq saqtaý salasyndaǵy kadr saıasatynyń uzaq merzimdi boljamy ázirlendi, sondaı-aq tapshy medısınalyq mamandyqtardy: epıdemıolog, ınfeksıonıst, reanımatolog, pýlmonolog, kardıologtardy daıarlaý ulǵaıtyldy.
«Ańsaǵan sábı» baǵdarlamasy aıasynda 2021 jyldan bastap EKU boıynsha kvota sany 7 esege artady.