Byltyr qarasha aıynan bastap jyljymaıtyn múliktiń tehnıkalyq pasportyn elektrondy túrde alý múmkindigi astana men Shymkent qalasynyń turǵyndaryna berilgen-di. Endi «Azamattarǵa arnalǵan úkimet» memlekettik korporasııasy «Ulttyq aqparattyq tehnologııalar» AQ-men birlesip, atalǵan memlekettik qyzmetti Qazaqstannyń barlyq óńiriniń turǵyndary egov.kz elektrondy úkimet portalynan alýyna múmkindik jasady. Jańa qyzmet qazaqstandyqtarǵa HQO-ǵa barmaı-aq, jyljymaıtyn múlik tehpasportyn onlaın alýǵa múmkindik beredi.
Elektrondy tehpasportty elektrondy úkimet portalynda alý úshin «Jyljymaıtyn múlik» bólimine kirip, «Jyljymaıtyn múlik obektisiniń tehnıkalyq pasportyn alýǵa elektrondy ótinish berý» qyzmetin tańdaý qajet. Páterlerdiń, jataqhana bólmeleriniń, jeke garajdardyń jáne saıajaı qurylystarynyń quqyq ıeleri onlaın suraý salǵannan keıin tizimde kórsetilgen qujattardy tirkeýi qajet. Qujatty daıyndaý merzimi jyljymaıtyn múlik túrine baılanysty. Tehnıkalyq tekserý qorytyndysy boıynsha páterdiń, jataqhanalardaǵy bólmeniń tehpasporty úsh jumys kúni, jeke garajdar men saıajaı qurylystaryna bes jumys kúni ótken soń beriledi. Páter, jataqhana bólmesi, jeke garajdar men saıajaı qurylystaryna rásimdeletin elektrondy tehpasport HQO-da qoltańbamen rastalyp, mór basylyp beriletin qujattaǵydaı birdeı derekterdi qamtıdy. Tehpasporttyń elektrondy balamasy Memlekettik qyzmetterdi kórsetýge tartylǵan qyzmetkerlerdiń elektrondy-sıfrly qoltańbasymen rastalatyn bolady.
Aıta keteıik, Nur-Sultan jáne Shymkent qalalarynda júzege asyrylǵan qanatqaqty joba aıasynda 12 myńnan astam qazaqstandyq jańa tehpasportty elektrondy tásilmen alǵan.